पारगाव: आंबेगाव तालुक्याच्या पूर्व भागात उन्हाळी हंगामातील टोमॅटो तोडणी सुरू झाली आहे. उत्पादनदेखील चांगले निघत आहे. परंतु, टोमॅटोला बाजारभाव मात्र समाधानकारक मिळत नाही. त्यामुळे टोमॅटो पिकासाठी गुंतवलेले भांडवल वसूल होणार नसल्याने टॉमेटो उत्पादक शेतकर्यांमध्ये नाराजी दिसत आहे.
तालुक्याच्या पूर्व भागात उन्हाळी हंगामात टोमॅटो पीक शेतकरी मोठ्या प्रमाणावर घेतात. टोमॅटोला बाजारभावाची साथ मिळाली शेतकर्यांना लाखो रुपये मिळतात. परंतु, गेल्या अनेक दिवसांपासून टॉमेटोला समाधानकारक बाजारभाव मिळत नाही. टोमॅटो पिकासाठी शेतकर्यांनी लाखो रुपयांचे भांडवल गुंतवले आहे. परंतु, सध्या मिळणार्या बाजारभावातून भांडवल वसूल होणे कठीण आहे.
सध्या पारगाव परिसरात टोमॅटो तोडणी सुरू आहे. शेतकरी टोमॅटोची प्रतवारी करून नारायणगाव (ता. जुन्नर) येथील बाजारात टोमॅटो विक्रीसाठी पाठवत आहेत. परंतु, तेथे टोमॅटो क्रेटला (20 किलो) दोनशे रुपयांपर्यंत बाजारभाव मिळत आहे. हा बाजारभाव शेतकर्यांना अपेक्षित नाही. टोमॅटो पिकासाठी शेतकर्यांनी रोपे, खते ,औषधे बाग बांधणी यासाठी लाखो रुपयांचे भांडवल गुंतविले आहे. त्यामुळे सध्या मिळणारा दर शेतकर्यांची निराशा वाढवणारा ठरत आहे.
यंदा टोमॅटो उत्पादनात प्रचंड वाढ
आंबेगाव तालुक्यात बहुतांशी भागांमध्ये उन्हाळी हंगामात टोमॅटो पीक मोठ्या प्रमाणावर घेतले जाते. यंदा टोमॅटो पिकाला शेवटपर्यंत मुबलक प्रमाणात पाणी मिळाले. तसेच अनुकूल हवामानाची साथ मिळाली. कीड रोगांचा प्रादुर्भाव कमी झाला. त्यामुळे उत्पादनात प्रचंड वाढ झाली असल्याचे शिंगवे येथील टोमॅटो उत्पादक शेतकरी बाळासाहेब वाव्हळ यांनी सांगितले.
