Market Update: पुण्यात फळभाज्यांत स्वस्ताई; पालेभाज्यांच्याही भावात घसरण

पुणे: भोगी, संक्रांतीनंतर पुणे कृषी उत्पन्न बाजार समितीच्या गुलटेकडी मार्केट यार्डातील तरकारी विभागात फळभाज्यांच्या मागणीत घट झाली आहे. बाजारात होत असलेल्या मागणीच्या तुलनेत मोठ्या प्रमाणात माल बाजारात दाखल झाल्याने टोमॅटो, काकडी, पापडी, वालवर, कोबी, ढोबळी मिरची, शेवगा, घेवडा व मटारच्या भावात दहा टक्क्यांनी घसरण झाली आहे. उर्वरित सर्व फळभाज्यांची आवक-जावक कायम असल्याने दर गतआठवड्याच्या तुलनेत टिकून राहिले.

मागील काही दिवसांत कांद्याच्या दरात सातत्याने घसरण होत असल्याने रविवारी (दि. 19) शेतकर्‍यांनी कमी प्रमाणात कांदा विक्रीसाठी पाठविला. बाजारात अवघ्या 75 ट्रकमधून कांदा विक्रीसाठी दाखल झाला. मागील आठवड्यात हीच आवक तब्बल 125 ट्रक एवढी होती. गतआठवड्याच्या तुलनेत आवक तब्बल 50 ट्रकने घटली. आवकच्या तुलनेत मागणी मोठी राहिल्याने घाऊक बाजारात कांद्याच्या दरात किलोमागे दहा रुपयांनी वाढ झाल्याचे सांगण्यात आले.

परराज्यांतून झालेल्या आवकमध्ये कर्नाटक, गुजरात आणि आंध्रप्रदेश येथून हिरवी मिरची सुमारे 8 ते 10 टेम्पो, कर्नाटक आणि गुजरात येथून कोबी 4 ते 5 टेम्पो, कर्नाटक व आंध्रप्रदेश येथून घेवडा 5 ते 6 टेम्पो, कर्नाटक येथून पावटा 2 ते 3 टेम्पो, आंध्रप्रदेश, तमिळनाडू येथून शेवगा 5 ते 6 टेम्पो, राजस्थान येथून 14 ते 15 ट्रक गाजर, कर्नाटक येथून 2 टेम्पो भुईमूग शेंग, मध्यप्रदेश व राजस्थान येथून सुमारे 18 ते 20 टेम्पो मटार, तामिळनाडू येथून 1 टेम्पो तोतापुरी कैरी, मध्यप्रदेश येथून लसणाची सुमारे 8 ते 10 टेम्पो आवक झाली होती.

स्थानिक भागातून झालेल्या आवकमध्ये सातारी आले सुमारे 500 ते 600 गोणी, भेंडी 7 ते 8 टेम्पो, गवार 4 ते 5 टेम्पो, काकडी 8 ते 10 टेम्पो, कोबी 4 ते 5 टेम्पो, हिरवी मिरची प्रत्येकी 4 ते 5 टेम्पो, टोमॅटो 10 ते 12 हजार पेटी, फ्लॉवर 14 ते 15 टेम्पो, ढोबळी मिरची 10 ते 12 टेम्पो, तांबडा भोपळा 10 ते 12 टेम्पो, कांदा सुमारे 70 ते 75 ट्रक, इंदौर, आग्रा, स्थानिक भागातून बटाटा 40 ते 45 टेम्पो आवक झाल्याची माहिती ज्येष्ठ आडतदार विलास भुजबळ यांनी दिली.

पालेभाज्यांच्या ही भावात घसरण

फळभाज्यांप्रमाणे पालेभाज्यांची आवक घटली आहे. तरीही संक्रांतीनंतर फळभाज्यांची मागणी मोठ्या प्रमाणात कमी झाली आहे. त्यामुळे कोथिंबीर, मेथी, कांदापात, करडई, पुदीना, अंबाडी, मुळे, राजगिरा, चवळई, पालक आणि हरभरा गड्डीच्या भावात 10 ते 20 टक्क्यांनी घट झाली आहे. तर उर्वरित पालेभाज्यांचे भाव मागील आठवड्याच्या तुलनेत स्थिर आहेत.

येथील बाजारात रविवारी (दि. 19) कोथिंबिरीची सुमारे सव्वा लाख जुडी आवक झाली. ही आवक मागील आठवड्याच्या तुलनेत कमी आहे. तर मेथीची 70 हजार जुडी आवक झाली. ही आवक मागील आठवड्याच्या तुलनेत स्थिर आहे. हरभरा गड्डीची 15 ते 20 हजार जुडीची आवक नोंदविण्यात आली. या आवकमध्ये घट झाली असल्याचे व्यापार्‍यांनी सांगितले.