पुणे: बांगलादेशातील एका अल्पवयीन मुलीला तिच्याच मैत्रिणीने पाच लाख रुपयांना बुधवार पेठेतील एका कोठेवालीला विकले. यानंतर कोठेवालीने ‘तू बांगलादेशी असल्याचे पोलिसांना सांगून गुन्हा दाखल करेन,’ अशी धमकी देत तिला जबरदस्तीने वेश्याव्यवसाय करण्यास भाग पाडले.
पाच महिन्यांत झालेल्या अत्याचारांना वैतागून तरुणीने कशीबशी स्वत:ची सुटका करत पोलिस ठाणे गाठले. तिने दिलेल्या तक्रारीनुसार पाच महिलांवर गुन्हे दाखल झाले असून, एका महिलेला फरासखाना पोलिसांनी अटक केली आहे.
पोलिसांनी दिलेल्या माहितीनुसार पीडित मुलगी 16 वर्षे दोन महिन्यांची आहे. तिला बांगलादेशातून मैत्रिणीने नोकरी आणि फिरण्याचे आमिष दाखवत पुण्यात आणले. यासाठी त्यांनी बांगलादेशातून नदीमार्गे बेकायदा भारताची सीमा ओलांडली. पुण्यात आल्यावर त्या भोसरीमध्ये सात ते आठ दिवस राहिल्या. यानंतर तिच्या मैत्रिणीने तिला बुधवार पेठेत आणले. तिथे तिला एका महिलेला पाच लाखांना विकले.
यानंतर महिलेने तिला तुळशीबाग आणि बुधवार पेठेतील कोठ्यात ठेवले. तिला पोलिसांत देण्याची धमकी देत वेश्याव्यवसाय करण्यात भाग पाडले. दरम्यान, पीडितेला अत्याचार सहन होत नव्हते. मात्र, तिला खोलीतून बाहेर पडू दिले जात नव्हते. तिच्या मोबाईलमधील सीम कार्डसुद्धा आरोपींनी काढून घेतले होते. पाच महिने अत्याचार सहन केल्यावर तिने एकदा सुटकेचा प्रयत्न केला.
मात्र, तो असफल झाला. मात्र, ती 7 एप्रिलला कशीबशी खोलीतून बाहेर पडली. तिने बस, रिक्षा पकडत हडपसर गाठले. तेथे हडपसर पोलिस ठाण्याची माहिती मिळताच तेथे धाव घेत तक्रार दाखल केली. हडपसर पोलिसांनी गुन्हा दाखल करत तो फरासखाना पोलिसांकडे वर्ग केला. याप्रकरणी फरासखाना पोलिसांनी पाच महिलांवर गुन्हा दाखल करत एका महिलेला अटक केली आहे. याप्रकरणी तपास वरिष्ठ पोलिस निरीक्षक प्रशांत भस्मे करत आहेत.
याप्रकरणी हडपसर पोलिसांनी गुन्हा दाखल केला असून, एका महिलेला अटक केली आहे. पुढील तपास सुरू आहे.
- प्रशांत भस्मे, वरिष्ठ पोलिस निरीक्षक, फरासखाना पोलिस ठाणे
