पुणे: शहराची ओळख आता अपघातांचे शहर म्हणून होऊ लागली असतानाच शहरात वेगवेगळ्या अपघातांत चौघांचा मृत्यू झाल्याची घटना घडली आहे. सदाशिव पेठेतील ना. सी. फडके चौक, पुणे-सातारा रस्त्यावरील पद्मावती, मुंबई-बेंगळुरू बाह्यवळण मार्ग, तसेच नगर रस्ता परिसरात अपघाताच्या घटना घडल्या. पुणे-सातारा रस्त्यावरील पद्मावती परिसरात भरधाव टेम्पोच्या धडकेत दुचाकीस्वाराचा मृत्यू झाल्याची घटना घडली.
अपघात 1
याप्रकरणी टेम्पोचालकाविरुद्ध सहकारनगर पोलिसांनी गुन्हा दाखल केला. विजय शंकर रेळेकर (वय 55, रा. देवराई, स्वामी नारायण मंदिराजवळ, आंबेगाव) असे मृत्युमुखी पडलेल्या दुचाकीस्वाराचे नाव आहे. याबाबत रेळेकर यांचे भाऊ गणेश (वय 53, रा. गुरुराज सोसायटी, पद्मावती, पुणे-सातारा रस्ता) यांनी सहकारनगर पोलीस ठाण्यात फिर्याद दिली आहे. दुचाकीस्वार विजय रेळेकर हे बुधवारी रात्री सव्वाअकराच्या सुमारास पुणे-सातारा रस्त्यावरून निघाले होते. पद्मावती परिसरातील स्वामी विवेकानंद पुतळ्याजवळ टेम्पोच्या धडकेत दुचाकीस्वार रेळेकर यांचा मृत्यू झाला.
अपघात 2
सदाशिव पेठेतील ना. सी. फडके चौकात मोटारीच्या धडकेत दुचाकीस्वार ज्येष्ठ नागरिकाचा मृत्यू झाल्याची घटना घडली. रुपचंद सदाशिव घोणे (वय 80, रा. शाहू महाविद्यालय रस्ता, पर्वती) असे मृत्युमुखी पडलेल्या ज्येष्ठ नागरिकाचे नाव आहे. याबाबत घोणे यांचा मुलगा चंद्रशेखर (वय 50) यांनी पर्वती पोलिस ठाण्यात फिर्याद दिली आहे. मोटारचालकाविरुद्ध गुन्हा दाखल केला आहे. दुचाकीस्वार रुपचंद घोणे हे बुधवारी रात्री आठच्या सुमारास ना. सी. फडके चौकातून पर्वतीकडे निघाले होते. त्या वेळी भरधाव मोटारीने त्यांना धडक दिली. अपघातात गंभीर जखमी झालेल्या घोणे यांना खासगी रुग्णालयात दाखल करण्यात आले. उपचारांपूर्वीच त्यांचा मृत्यू झाला होता. पोलिस उपनिरीक्षक इस्माईल शेख तपास करत आहेत.
अपघात 3
मुंबई-बेंगळुरू बाह्यवळण मार्गावर वडगाव उड्डाणपुलाजवळ सेवा रस्त्याच्या कडेला थांबलेल्या खासगी बसवर आदळून दुचाकीस्वार तरुणाचा मृत्यू झाल्याची घटना घडली. अपघातात दुचाकीस्वार शुभम शुक्ला (वय 36, रा. अलंकाकृती सोसायटी, बाणेर-सूस रस्ता) यांचा मृत्यू झाला.
अपघात 4
सेवा रस्त्याच्या कडेला धोकादायक पद्धतीने बस लावून अपघाताला जबाबदार ठरल्याप्रकरणी बसचालक दिगंबर बाळासाहेब शिंदे (वय 32) याच्याविरुद्ध गुन्हा दाखल केला. याबाबत पोलिस शिपाई प्रणिल मेस्त्री यांनी सिंहगड रोड पोलिस ठाण्यात फिर्याद दिली आहे. पोलिस उपनिरीक्षक सागर पवार तपास करत आहेत.
