पुणे: विसर्जन मिरवणूक सोहळ्यात वार्तांकन करणार्या महिला पत्रकाराशी अश्लील वर्तन करून तिच्याबरोबर असलेल्या सहकार्याला धक्काबुक्की केल्याप्रकरणी त्रिदल ढोल-ताशा पथकातील वादकाविरुद्ध पोलिसांनी गुन्हा दाखल केला आहे.
बेलबाग चौकात ही घटना घडली. याबाबत महिला पत्रकाराने फरासखाना पोलिस ठाण्यात फिर्याद दिली आहे. त्यानुसार त्रिदल या ढोल-ताशा पथकातील दोन वादकांविरुद्ध भारतीय न्याय संहिता कलम 74, 75 (1), 352, 3 (5) अन्वये गुन्हा दाखल केला आहे. (Latest Pune News)
फिर्यादी महिला पत्रकार विसर्जन सोहळ्यात शनिवारी (दि. 6 सप्टेंबर) सायंकाळी सव्वासातच्या सुमारास वार्तांकन करीत होती. त्या वेळी त्रिदल ढोल-ताशा पथकातील एका वादकाने लोखंडी ट्रॉली ओढत आणली. पायावरून चाक गेल्याने महिला पत्रकाराने त्याच्याकडे विचारणा केली, तेव्हा वादकाने महिला पत्रकाराशी वाद घालून धक्काबुक्की केली. तिच्याबरोबर अश्लील वर्तन केले. महिला पत्रकाराबरोबर असलेल्या सहकार्याने वादकाला जाब विचारल्याने त्याला धक्काबुक्की केली.
ढोल पथकातील दोन वादकांनी शिवीगाळ केली. त्यानंतर महिला पत्रकाराने पोलिसांकडे तक्रार अर्ज दिला. याप्रकरणी ढोल-ताशा पथकातील दोन वादकांविरुद्ध गुन्हा दाखल केला असून, पोलिस उपनिरीक्षक पूनम पाटील तपास करीत आहेत. याप्रकरणी पुणे श्रमिक पत्रकार संघाच्या शिष्टमंडळाने पोलिस आयुक्त अमितेश कुमार यांना सोमवारी निवेदन दिले.
