पुणे: कोथरूड भागातील एका सोसायटीतील सदनिकेत ज्येष्ठ महिला जळालेल्या अवस्थेत आढळली. 76 वर्षीय महिलेने पेटवून घेऊन आत्महत्या केल्याचा संशय पोलिसांनी व्यक्त केला आहे. याप्रकरणी कोथरूड पोलिसांकडून तपास करण्यात येत आहे. कमल घुगे (वय 76) असे मृतावस्थेत सापडलेल्या महिलेचे नाव आहे.
पोलिसांनी दिलेल्या माहितीनुसार, गुरुगणेशकृपा सोसायटीच्या डी विंगमध्ये कोथरूड येथे कमल घुगे राहायला होत्या. सोमवारी (दि. 31) सकाळी साडेआठच्या सुमारास सोसायटीतील रहिवाशांनी अग्निशमन दलाशी संपर्क साधला. घुगे यांच्या सदनिकेतून धूर येत असल्याची माहिती रहिवाशांनी दिली. या घटनेची माहिती मिळताच अग्निशमन दलाचे केंद्रप्रमुख प्रकाश गोरे आणि जवानांनी घटनास्थळी धाव घेतली.
पहिल्या मजल्यावरील सदनिकेचा दरवाजा जवानांनी उघडला, तेव्हा घुगे गंभीररीत्या होरपळल्या होत्या. सदनिकेतील साहित्याला आग लागली नव्हती. घुगे यांना तातडीने रुग्णालयात दाखल करण्यात आले मात्र, उपचारांपूर्वीच त्यांचा मृत्यू झाला होता.
घुगे एकट्या सदनिकेत राहायला होत्या. त्यांनी सदनिका भाडेतत्त्वावर घेतली होती, अशी माहिती अग्निशमन दलाचे केंद्रप्रमुख प्रकाश गोरे यांनी दिली. या घटनेची माहिती मिळताच कोथरूड पोलिसांनी घटनास्थळी भेट दिली. घुगे यांनी पेटवून घेऊन आत्महत्या केल्याचा संशय पोलिसांनी व्यक्त केला आहे. या प्रकरणाचा तपास सुरू असल्याचे परिमंडळ तीनचे पोलिस उपायुक्त संभाजी कदम यांनी सांगितले.
