बावडा : श्री क्षेञ निरा नरसिंहपूर (ता. इंदापूर ) येथे मुख्यमंत्री देवेंद्र फडणवीस यांनी प्रसिद्ध श्री लक्ष्मी-नृसिंहाचे शनिवारी (दि.29) दर्शन घेतले. यावेळी त्यांनी मंदिरामध्ये श्री नृसिंहाची पूजा व आरती केली. भीमा व नीरा या 2 नद्याच्या संगमावरती प्राचीनकालीन असलेले श्री लक्ष्मी-नृसिंह मंदिर वसलेले आहे. श्री लक्ष्मी-नृसिंह देवस्थान हे मुख्यमंत्री देवेंद्र फडणवीस यांचे कुलदैवत आहे. त्यामुळे मुख्यमंत्री देवेंद्र फडणवीस हे येथे नेहमी दर्शनासाठी येत असतात.
तिसऱ्यांदा मुख्यमंत्री झाल्यानंतर देवेंद्र फडणवीस यांनी कुलदैवत श्री लक्ष्मी-नृसिंहाचे मंदिरामध्ये येऊन दर्शन घेत कुलदैवताचे आशीर्वाद घेतले. यावेळी क्रीडा व युवक कल्याण मंत्री दत्तात्रय भरणे, ग्रामविकास मंत्री जयकुमार गोरे, आ. विजय शिवतारे, आ. राहुल कुल, माजी खासदार रणजीतसिंह नाईक निंबाळकर, माजी आमदार राम सातपुते, वासुदेव काळे, पद्मजादेवी मोहिते पाटील, पृथ्वीराज जाचक, बाळासाहेब गावडे, मयुरसिंह पाटील, प्रवीण माने, हनुमंत कोकाटे, भाजपचे तालुकाध्यक्ष तेजस देवकाते आदी मान्यवर पदाधिकारी, कार्यकर्ते, ग्रामस्थ उपस्थित होते. दरम्यान, पूजेनंतर मुख्यमंत्री देवेंद्र फडणवीस यांनी मंदिर परिसरात विकास कामांची पाहणी करीत अधिकाऱ्यांकडून माहिती घेतली. त्यानंतर नेहमीप्रमाणे दशरथ राऊत यांच्या हॉटेलमध्ये त्यांनी चहा घेतला.
