पुणे : प्रतिबंधात्मक आदेशाचे उल्लंघन करून कात्रज चौकात आंदोलन केल्याप्रकरणी शिवसेना ठाकरे गटाचे पदाधिकारी वसंत मोरे यांच्यासह 25 ते 30 शिवसैनिकांविरुद्ध भारती विद्यापीठ पोलिस ठाण्यात गुन्हा दाखल करण्यात आला आहे.
या प्रकरणी पोलिस हवालदार सुनील हनवते यांनी भारती विद्यापीठ पोलिस ठाण्यात फिर्याद दिली आहे. त्यानुसार शिवसेना ठाकरे गटाचे शहर पदाधिकारी, माजी नगसेवक वसंत मोरे, प्रतीक कोडितकर, नितीन जगताप, ओंकार भोसले, अनिकेत खिरीड यांच्यासह 25 ते 30 शिवसैनिकांविरुद्ध गु्न्हा दाखल करण्यात आला आहे.
पोलिसांनी दिलेल्या माहितीनुसार, कात्रज कोंढवा रस्ता, कात्रज चौकाची पाहणी करण्यासाठी शुक्रवारी (27 जून) रोजी महापालिका आयुक्त, महापालिकेचे अधिकारी, आमदार योगेश टिळेकर आले होते. या वेळी कात्रज चौकात वसंत मोरे यांच्या नेतृत्त्वाखाली दुपारी बाराच्या सुमारास आंदोलन करण्यात आले. कात्रज-कोंढवा रस्त्याचे रुंदीकरण करण्यात यावे, तसेच आमदार साहेब स्टंटबाजी बंद करा, असे फलक लावून शिवसैनिकांनी घोषणाबाजी केली. पुणे महापालिकेच्या अधिकार्यांना रस्त्याचे काम पाहण्यास मज्जाव केला. त्या वेळी पोलिसांनी त्यांना घोषणबाजी न करता निघून जाण्यास सांगितले. शहरात प्रतिबंधात्मक आदेश असताना आंदोलन केल्याप्रकरणी मोरे यांच्यासह 25 ते 30 कार्यकर्त्यांविरुद्ध गुन्हा दाखल करण्यात आला. या प्रकरणाचा पुढील तपास सहायक पोलिस निरीक्षक शेंडे करत आहेत.
