Pune Political News: खडकवासला विधानसभा मतदारसंघाचे भाजप महायुतीचे उमेदवार आमदार भीमराव तापकीर यांनी सोमवारी जोरदार शक्तिप्रदर्शन करत रॅली काढून आपला उमेदवारी अर्ज दाखल केला. कार्यकर्त्यांनी जागोजागी फटाके वाजवून आणि क्रेनच्या साहाय्याने भल्यामोठ्या पुष्पहाराने या रॅलीचे स्वागत केले.
भीमराव तापकीर यांनी प्रथम धनकवडीचे ग्रामदैवत येथील जानुबाई देवीचे दर्शन घेतले. त्यानंतर इच्छापूर्ती गणपतीचे दर्शन घेऊन सुरू झालेल्या रॅलीत महायुतीचे पदाधिकारी, नेते आणि कार्यकर्ते सहभागी झाले होते. यात महिलांची संख्या लक्षणीय होती.
रॅलीतील रथामधून भीमराव तापकीर यांच्यासह भाजपचे केंद्रीय राज्यमंत्री मुरलीधर मोहोळ, माजी खासदार प्रदीप रावत यांच्यासह महायुतीचे पदाधिकारी हात उंचावून नागरिकांना अभिवादन करीत होते. खडकवासला मतदारसंघाचे निवडणूक कार्यालय असलेल्या वडगाव येथील सिंहगड महाविद्यालयात भीमराव तापकीर यांनी सपत्नीक दुचाकीवर जाऊन उमेदवारी अर्ज दाखल केला.
भीमराव तापकीर यांना चौथ्यांदा खडकवासला मतदारसंघातून उमेदवारी मिळाली आहे. ते म्हणाले की, गेल्या तीन वेळच्या विधानसभा कार्यकाळात केलेल्या विकासकामांच्या बळावर या निवडणुकीला सामोरे जात आहे. जनतेच्या आशीर्वादाने चौथ्यांदा आमदार होणार असल्याचा विश्वास या वेळी त्यांनी व्यक्त केला.
आपला आमदार दमदार, आमदार अब की बार चौकार, साधा माणूस, सर्वसामान्यांचा नेता पुन्हा होणार आमदार, अशा आशयाचे फलक घेऊन अनेक तरुण या रॅलीत सहभागी झाले होते. तसेच महिला, ज्येष्ठ नागरिकही या मिरवणुकीत भगवी टोपी, भाजपचे उपरणे घालून सहभागी झाले होते.
