पुणे: महापालिकेने डांबर खरेदी घोटाळा झाला असून, थेट कंपनीकडून डांबर खरेदी न केल्याने कोट्यवधी रुपयांचे आर्थिक नुकसान झाले असल्याचा आरोप स्थायी समितीचे माजी अध्यक्ष नीलेश निकम यांनी केला आहे. सार्वजनिक बांधकाम विभागाकडे (पीडब्ल्यूडी) असलेल्या ‘अॅप’ मुळे सदर ठेकेदार नेमका कोणाला डांबरपुरवठा करतो याविषयी शंका निर्माण झाल्याचा दावा निकम यांनी केला आहे.
याबाबत पत्रकार परिषदेत माहिती देताना निकम म्हणाले, पूर्वी महापालिका रस्त्यांच्या कामासाठी थेट पेट्रोल उत्पादक कंपन्यांकडून डांबर खरेदी करीत होते. त्यामुळे महापालिकेला प्रतिटनामागे साडेसहा हजार ते सात हजार रुपये इतकी सवलत मिळत होती. परंतु गेल्या तीन वर्षांपासून थेट कंपनीकडून केली जाणारी डांबर खरेदी महापालिकेने बंद केली.
तीन वर्षांपूर्वी महापालिकेने डांबर खरेदीसाठी निविदा प्रक्रिया राबविली होती. त्यानंतर दरवर्षी ही निविदा काढली जात आहे. प्रत्यक्षात पुरवठादार ठेकेदाराची कंपनी या निविदेत पात्र ठरेल अशा पध्दतीच्या अटी या निविदा प्रक्रियेत टाकण्यात आल्याचा आरोप निकम यांनी केला.
पेट्रोल उत्पादक कंपन्या या सरकारी असल्याने त्यांच्याकडून डांबर खरेदीत ‘कमिशन’ मिळत नसल्याने महापालिका प्रशासनाकडून ठेकेदारामार्फत डांबर खरेदी करण्याचा निर्णय घेण्यात आल्याचा आरोपही त्यांनी केला.
ते पुढे म्हणाले, ऑगस्ट 2024 ते फेब्रुवारी 2025 या कालावधीत महापालिकेच्या नोंदीनुसार 2 हजार 301 मेट्रिक टन डांबर खरेदी केले गेले. या खरेदीत अनेक त्रुटी आणि भ्रष्टाचार आहे. डांबराचे दर हे पंधरा दिवसांनी बदलतात, सदर ठेकेदार हा महापालिकेला डांबराच्या प्रचलित दराच्या सहा टक्के कमी दराने डांबरपुरवठा करत आहे. प्रत्यक्षात महापालिकेने थेट डांबर खरेदी केले, तर आणखी कमी दराने ते उपलब्ध होऊ शकते, असा आरोप निकम यांनी केला.
अधिकार्यांशी संगनमत ?
डांबरपुरवठा करणार्या ठेकेदाराकडून डांबराचा ट्रक प्लांटमध्ये पाठविला गेल्यानंतर तेथे डांबराची चोरी होते. ट्रक पूर्णपणे खाली केला जात नाही. अशाप्रकारे दहा ट्रक डांबरांची चोरी झाली आहे, असा आरोप निकम यांनी करीत, यात महापालिकेचे अधिकारी सामील असल्याचा दावा केला.
