पारगाव: आंबेगाव तालुक्याच्या पूर्व भागात जिल्हा परिषद प्राथमिक शाळांचा बोलबाला आता वाढला आहे. विविध शाळांमधील अनेक विद्यार्थी विविध परीक्षांच्या माध्यमातून गुणवत्ता यादीत सरस ठरत आहेत. आता नवीन वर्षाचे इयत्ता पहिलीसाठी विद्यार्थ्यांचे बहुतांश शाळांचे प्रवेश आत्तापासूनच ‘फुल्ल’ झाले आहेत.
अनेक गावांमध्ये जिल्हा परिषदेच्या प्राथमिक शाळांमध्ये इंग्रजी माध्यमाच्या विद्यार्थ्यांचा प्रवेश निश्चित झाला आहे. लहान-मोठ्या शाळांचे गावागावांत, चौकांत चिमुकल्या विद्यार्थ्यांच्या गुणवत्तेचे ‘फ्लेक्स’ लागलेले दिसत आहेत.
गेल्या दहा वर्षांमध्ये जिल्हा परिषदेच्या प्राथमिक शाळांनी गुणवत्ता यादीत मोठी सरस कामगिरी केली आहे. ग्रामीण भागात इंग्रजी माध्यमाच्या शाळांची संख्या वाढतच चालली आहे. ग्रामीण भागातील पालकांचादेखील इंग्रजी माध्यमाच्या शाळांकडे आपल्या पाल्यांचा प्रवेश घेण्याकडेच कल असल्याचे दिसत आहे. परंतु, तरी देखील गुणवत्तेत वाढ झाल्याने जिल्हा परिषद शाळांमधील विद्यार्थी पटसंख्या आता दिवसेंदिवस वाढत आहे. जिल्हा परिषद प्राथमिक शाळेतील शिक्षक विद्यार्थ्यांच्या
गुणवत्तावाढीसाठी विशेष परिश्रम घेत आहेत. सध्या तालुक्याच्या पूर्व भागात सर्वच गावांमध्ये चौकाचौकांत जिल्हा परिषद प्राथमिक शाळांमधील चिमुकल्यांचे ‘फ्लेक्स’ लावण्यात आलेले आहेत. त्या ‘फ्लेक्स’वर संबंधित जिल्हा परिषद प्राथमिक शाळेची वैशिष्ट्ये, गतवर्षीच्या शैक्षणिक वर्षात विशेष यश संपादन केलेल्या विद्यार्थ्यांची छायाचित्रे झळकविण्यात आली आहेत.
गावागावांतील चौकांत लावलेल्या ‘फ्लेक्स’वर संबंधित शाळांच्या इमारतींची छायाचित्रे तसेच नवोदय, सैनिक स्कूल, ज्ञानप्रबोधिनी प्रशाला, सरस्वती अॅकॅडमी, मंथन, एन.एस.एस.ई हसत-खेळत या परीक्षांमध्ये उत्तुंग यश संपादन केलेल्या विद्यार्थ्यांची छायाचित्रे छापली आहेत. सन 2024-25 या शैक्षणिक वर्षात आंबेगाव तालुक्यातून 9 विद्यार्थी नवोदय प्रवेशपात्र ठरले. त्यापैकी पिंपळगाव शाळेतील 5 व साकोरेमळा शाळेतील 4 हे जिल्हा परिषद प्राथमिक शाळांमधीलच विद्यार्थी पात्र ठरले.
शिक्षकांचे कष्ट, पालकांची साथ
जिल्हा परिषद प्राथमिक शाळांमध्ये शिक्षक देखील आता विद्यार्थ्यांच्या गुणवत्तावाढीसाठी कठोर परिश्रम घेताना दिसत आहेत. जादा तासाचे नियोजन, विविध स्पर्धा परीक्षांची इयत्ता पहिलीपासूनच ते तयारी करताना दिसत आहेत. विविध प्रकाशनांच्या स्पर्धा परीक्षांची तयारी विद्यार्थ्यांकडून शिक्षक करून घेत आहेत. ते शनिवारी, रविवारी देखील सुटी घेत नाहीत. या गुणवत्तावाढीसाठी शिक्षकांना पालकांची देखील चांगली साथ मिळत असल्याचे चित्र दिसत आहे.
शिंगवे गावातील साकोरेमळा जिल्हा परिषद प्राथमिक शाळेत पटसंख्या 158 होती. त्यापैकी तब्बल 101 विद्यार्थी हे राज्य व जिल्हा गुणवत्ता यादीत झळकले आहेत. साकोरेमळा शाळेत इयत्ता पहिलीसाठी 55 विद्यार्थ्यांचे प्रवेश पूर्ण झाले आहेत. त्यापैकी तब्बल 35 विद्यार्थी हे इंग्रजी माध्यमाच्या शाळेतून आलेले आहेत.
बाबाजी गाढवे, मुख्याध्यापक, जि. प. प्राथमिक शाळा, साकोरेमळा
