Pune News: मद्यधुंद तरुणाने वाहतूक पोलिसांशी वाद घालत मारहाण केल्याची घटना शनिवारी सायंकाळी हडपसरमधील मगरपट्टा परिसरात घडली. या घटनेचा व्हिडीओ समाज माध्यमात व्हायरल झाला आहे. याप्रकरणी रात्री उशिरा तरुणाला हडपसर पोलिसांनी ताब्यात घेऊन त्याच्याविरुद्ध गुन्हा दाखल केला.
हडपसर वाहतूक विभागातील पोलीस कर्मचारी शनिवारी सायंकाळी मगरपट्टा परिसरातील रासकर चौकात वाहतूक नियमन करत होते. त्या वेळी विरुद्ध दिशेने येणार्या वाहनांवर ते कारवाई करत होते.
त्या वेळी एक जण तिथे थांबलेल्या नागरिकाला दगडाने मारण्याचा प्रयत्न करत होता. त्या वेळी तेथे वाहतूक नियमन करणार्या वाहतूक पोलिसाने त्याला हटकले. वाहतूक पोलिसाने हटकल्याने तरुणाने वाहतूक पोलिसाला मारहाण केली. या घटनेचा व्हिडीओ समाज माध्यमात व्हायरल झाला आहे.
दरम्यान या घटनेची माहिती मिळताच हडपसर वाहतूक विभागाचे पोलीस निरीक्षक तसेच हडपसर पोलिसांनी घटनास्थळी धाव घेतली. आरोपीला ताब्यात घेऊन पोलीस ठाण्यात आणण्यात आले. हडपसर पोलीस ठाण्यात रात्री उशिरापर्यंत त्याच्याविरुद्ध गुन्हा दाखल करण्याचे काम सुरू होते, अशी माहिती पोलिसांनी दिली.
