पुणे: पेट्रोलपंपावरील दरोड्याच्या तयारीतील टोळीला आंबेगाव बुद्रुक पोलिसांनी जेरबंद केले. चोरट्यांकडून कोयता, मिरचीपूड, दोरी असा 40 हजार रुपयांचा मुद्देमाल जप्त केला आहे. याप्रकरणी दोन अल्पवयीनांना ताब्यात घेण्यात आले आहे.
सौरभ गोरक्ष चौधरी (वय 23, रा. जय शंकर कॉलनी, अंजनीनगर, कात्रज), ओंकार महादेव देवकते (वय 22, रा. गल्ली क्रमांक 7, संतोषनगर, कात्रज), रघुनाथ प्रकाश मटकट्टे (वय 18) अशी अटक केलेल्यांची नावे आहेत.
दोन अल्पवयीनांना ताब्यात घेण्यात आले आहे. याबाबत पोलिस कर्मचारी हनमंत मासाळ यांनी आंबेगाव बुद्रुक पोलिस ठाण्यात फिर्याद दिली आहे.पोलिसांनी दिलेल्या माहितीनुसार, आंबेगाव बुद्रुक पोलिसांचे तपास पथक बुधवारी (दि. 25 एप्रिल) कात्रज भागात गस्त घालत होते.
त्या वेळी गंधर्व लॉनजवळ टोळके दरोडा टाकण्याच्या तयारीत असल्याची माहिती मिळाली. त्यानंतर पोलिसांच्या पथकाने सापळा लावला. गंधर्व लॉनजवळील मोकळ्या जागेत सापळा लावून पाच जणांना ताब्यात घेतले. त्यांच्याकडे कोयता, मिरचीपूड, दोरी असा मुद्देमाल सापडला. वरिष्ठ पोलिस निरीक्षक शरद झिने यांच्या मार्गदर्शनाखाली ही कारवाई करण्यात आली. पोलिस उपनिरीक्षक रतिकांत कोळी तपास करत आहेत.
