पिंपरी : किरकोळ वादातून 14 जणांच्या टोळक्याने वाहनांची तोडफोड करीत घरांवर दगडफेक केली. तसेच, कबुतरखान्यासही आग लावून परिसरात दहशत निर्माण केली. ही घटना रविवारी (दि. 28) रात्री साडेनऊच्या सुमारास साई पार्क, दिघी परिसरात घडली.
रूषीकेश नवनाथ वाळके (22, रा. आझाद हिंद मित्र मंडळाजवळ, साईपार्क, दिघी) यांनी दिघी पोलीस ठाण्यात फिर्याद दिली आहे. त्यानुसार, अर्जुनसिंग, संग्रामसिंग बाधा, अभिजित घोरपडे, सुरजितसिंग बाधा, करणसिंग, सोन्या, गजलसिंग बाधा, हुकूमसिंग बाधा, अजयसिंग टाक, महिला आरोपी आणि त्यांचे तीन साथीदार (नाव, पत्ता माहिती नाही) अशी गुन्हा दाखल झालेल्या आरोपींची नावे आहेत.
पोलिसांनी दिलेल्या माहितीनुसार, रविवारी रात्री साडेनऊच्या सुमारास फिर्यादी वाळके हे आपल्या घरात होते. त्यावेळी त्यांना आरडा-ओरडा आणि तोडफोडीचा आवाज आला.ते घराबाहेर आले असता अर्जुनसिंग, अभिजित घोरपडे, संग्रामसिंग यांनी फिर्यादी वाळके यांच्या हातावर आणि डोक्यावर कोयत्याने वार करून खूनी हल्ला केला.
अचानक झालेल्या हल्ल्यामुळे नागरिक सैरावैरा पळू लागले. त्यानंतर इतर आरोपींनी याच परिसरात राहणार्या दिगंबर घनश्याम पाटील यांच्यावर तलवारीने हल्ला केला. तसेच आरोपींनी केलेल्या दगडफेकीमध्ये विशाल तात्या मासाळ हे गंभीर जखमी झाले.
त्यानंतर हातातील कोयता, तलवार आणि दगडाने परिसरातील सहा दुचाकी, दोन टेम्पो, दोन मोटारी, दोन मिनीबस एक रिक्षा आणि एक बस अशा एकूण 14 वाहनांची तोडफोड केली. तसेच, या परिसरात असलेल्या कबुतर खान्यालाही आरोपींनी आग लावून दिली. दिघी पोलिस तपास करीत आहेत.
