Pune Municipal Corporation: महापालिकेतील 7 हजार 336 पदे रिक्त; 40 टक्के अधिकारी, कर्मचारी नसल्याने कामकाजावर परिणाम

पुणे: राज्यात क्षेत्रफळाच्या दृष्टीने सर्वांत मोठी महापालिका असलेल्या पुणे महापालिकेतील तब्बल 7 हजार 336 पदे रिक्त आहेत. रिक्त जागांचे प्रमाण जवळपास चाळीस टक्के इतके असून, अधिकारी-कर्मचार्‍यांची भरती होत नसल्याने महापालिकेच्या कामकाजावर मोठा परिणाम होत आहे.

नवनियुक्त महापालिका आयुक्त नवलकिशोर राम यांनी महापालिकेचा सेवकवर्ग विभागाच्या कामकाजाचा आढावा घेतला. यावेळी वर्ग 1 ते 4 मधील जवळपास 40 टक्के पदे रिक्त असल्याचे समोर आले आहे. (Latest Pune News)

गेल्या सात वर्षांत 32 गावांचा महापालिकेत समावेश झाला. त्यामुळे पुणे भौगोलिक दृष्ट्या देशातील दुसर्‍या आणि राज्यातील पहिल्या क्रमाकांची महापालिका ठरली आहे. मात्र, विस्तार वाढला असला तरी त्या प्रमाणात कर्मचारी भरती झालेली नाही.

2023 मध्ये महापालिकेची शेवटची भरती करण्यात आली, त्यानंतर महापालिकेने भरती प्रकिया राबवलेली नाही. महापालिकेने अभियंता पदासाठी मागील वर्षी अर्ज मागवले होते. आरक्षणाच्या कारणांमुळे ही प्रक्रिया सध्या स्थगित करण्यात आली आहे. लवकरच ही प्रक्रिया सुरु करण्यात येणार आहे.

अशी आहे महापालिकेतील कर्मचारीसंख्या

महापालिकेमध्ये सध्या वर्ग 1 ते 4 साठी एकुण 16 हजार 369 पदे मान्य आहेत. यापैकी 9 हजार 33 पदे भरलेली आहेत. त्यामुळे 7 हजार 336 पदे रिक्त आहेत. यामध्ये वर्ग 1 ची 147 पदे, वर्ग 2 ची 320 पदे, वर्ग 3 ची 3 हजार 493 पदे तर वर्ग 4 ची 3 हजार 456 पदे सध्या रिक्त आहेत. महापालिका गेल्या काही वर्षांपासून वर्ग 4 पदांची भरती प्रक्रिया राबवतच नाही.

ठेकेदारामार्फत ही पदे भरली जातात. हंगामी चतुर्थ श्रेणी कर्मचार्‍यांवर महापालिकेचा गाडा सुरु आहे. कनिष्ठ लिपिक, लिपिक पदेसुध्दा मोठ्या प्रमाणात रिक्त आहेत. गेल्या काही वर्षात महापालिकेतील कर्मचार्‍यांना बढती देण्यात आली मात्र यानंतर रिक्त झालेली पदे भरण्यात आली नाहीत. त्यामुळे फार मोठी पोकळी निर्माण झाली आहे.