राज्यात 65 टक्के उसाचे गाळप पूर्ण..

पुणे : पुढारी वृत्तसेवा : राज्यात चालू वर्ष 2023-24 मध्ये सुमारे 920 लाख टन उसाचे गाळप अपेक्षित आहे. त्यामध्ये 21 जानेवारीअखेर 590 लाख टन म्हणजे जवळपास 65 टक्के उसाचे गाळप पूर्ण झाले आहे, तर 9.39 टक्के सरासरी उतार्‍यानुसार 55 लाख टन इतके साखरेचे उत्पादन हाती आले आहे. पुणे विभागाला ऊसगाळप आणि साखर उत्पादनात मागे टाकत आता कोल्हापूर विभागाने बाजी मारल्याचे स्पष्ट झाले आहे.

राज्यात सद्य:स्थितीत 97 सहकारी आणि 101 खासगी मिळून 198 साखर कारखान्यांचा हंगाम सुरू आहे. या कारखान्यांची दैनिक ऊसगाळपाची क्षमता 9 लाख 19 हजार 850 टन इतकी आहे. गतवर्षी याच दिवशी 205 साखर कारखान्यांनी मिळून 680 लाख टन उसाचे गाळप पूर्ण केले होते, तर 9.61 टक्के सरासरी उतार्‍यानुसार 65 लाख टन साखरेचे उत्पादन तयार केले होते. याचा विचार करता चालू वर्षी अद्याप ऊसगाळप आणि साखर उत्पादन कमीच असल्याचे चित्र दिसून येत आहे.