Sugarcane Worker child death by wild animal
नसरापूर: ऊसतोड मजुराच्या पाच वर्षाचा मुलाचा अज्ञात वन्य प्राण्याच्या हल्ल्यात मृत्यू झाल्याची खळबळजनक घटना उघडकीस आली आहे. ही घटना केंजळ ( ता. भोर ) येथे आज (दि.७) सकाळी नऊ च्या सुमारास घडली. वनविभागाच्या अधिकाऱ्यांनी घटनास्थळी भेट दिली. मात्र, राजगड पोलिस ठाण्यात अद्याप या घटनेबाबत नोंद करण्यात आलेली नाही. हा हल्ला बिबट्याने केला की इतर वन्यप्राणी केला, याचा वनविभागाला तपास करावा लागणार आहे.
कृष्णा किरण सोनवणे (वय ५, रा. चाळीसगाव) असे वन्य प्राण्याच्या हल्ल्यात मृत्युमुखी पडलेल्या मुलाचे नाव आहे. येथील एका शेतकऱ्याच्या उसाच्या शेतात अत्यवस्थ जखमी अवस्थेत मुलगा आढळला. उपचारासाठी त्याला भोर जिल्हा उपरुग्णालयात नेण्यात आले. मात्र, उपचारापूर्वीच त्याचा मृत्यू झाल्याचे डॉक्टरांनी घोषित केले. मृत्यूचे कारण समजू शकले नाही.
अधिक माहिती अशी की, फलटण तालुक्यातील साखरवाडी कारखान्याचे ऊसतोड मजुराच्या केंजळ गावात कोप्या असून शेजारील शेतात ऊस तोडत असताना कृष्णा याला शौचालयाला आल्याने त्याची आई सरलाबाई हिने त्याला शेजारील शेताच्या बाजूला बसविले. काही वेळाने कृष्णा हा दिसेनासे झाल्याने ऊस मजुरांनी शोधाशोध केली असता कृष्णा हा रक्तबंबाळ अवस्थेत दिसला. यानंतर उपचारासाठी भोर रुग्णालयात नेले असता त्याचा दुर्दैवी मृत्यू झाला. वनविभाग याबाबत अधिक तपास करत आहे.
