पालघर : स्वतःच्या मेहनतीवर व जिद्दीच्या जोरावर आर्थिक स्वावलंबनाचा मार्ग शोधत पालघर जिल्ह्यातील ५८६६२ महिलांनी लखपती होण्याचा टप्पा पार केला आहे. ग्रामीण भागातील या महिलांनी लखपती दीदी अभियानाच्या माध्यमातून आपली वेगळी ओळख निर्माण केली आहे. शेतीपूरक व्यवसाय, अन्नप्रक्रिया, दुग्धव्यवसाय, लघुउद्योग आणि सेवा क्षेत्रात महिला उद्योजकता विकास होत असून त्यांचे दरमहा उत्पन्न सरासरी ९ ते १०००० रुपयांपर्यंत पोहोचली आहे.
राज्यातील ग्रामीण आणि आदिवासी महिलांच्या आर्थिक प्रगतीसाठी सुरु करण्यात आलेल्या लखपती दीदी योजनेअंतर्गत पालघर जिल्ह्यात ७३२५५ महिलांना अभियानात समाविष्ट करण्याचे उद्दिष्ट ठेवण्यात होते. त्यापैकी मोखाडा, जव्हार, डहाणू, वसई, विक्रमगड, वाडा, तलासरी आणि पालघर या आठ तालुक्यांमध्ये एकूण ५८६६२ महिला लखपती झाल्या आहेत. याची सरासरी टक्केवारी ८०% इतकी असल्याची माहिती जिल्हा ग्रामीण विकास यंत्रणेच्या प्रकल्प संचालिका डॉ. रुपाली सातपुते यांनी दिली आहे.
महिला सक्षमीकरणाच्या या प्रवासात महिलांनी विविध प्रकारचे व्यवसाय उभारले आहेत. दुग्धव्यवसाय, कुक्कुटपालन, अन्नप्रक्रिया, हस्तकला, कुटीर उद्योग आणि कृषीपूरक व्यवसाय यामधून त्यांना दरवर्षी १ लाख रुपयांपेक्षा अधिक उत्पन्न मिळू लागले आहे. पालघर जिल्हा प्रशासन, महिला व बालविकास विभाग आणि स्वयंसेवी संस्थांच्या मदतीने बचत गटांना प्रोत्साहन, व्यवसाय प्रशिक्षण आणि आर्थिक मदतीचे विविध पर्याय उपलब्ध करून दिले जात आहेत.पालघर जिल्ह्यात उर्वरित १४५९३ महिलांनाही लखपती बनवण्यासाठी विशेष प्रयत्न सुरू आहेत.
महिलांना दरवर्षी किमान एक लाख रुपये उत्पन्न मिळेल अशा स्वयंरोजगार संधी उपलब्ध करून देणे हा या अभियानाचा उद्देश आहे ग्रामीण महिलांना आर्थिक स्वावलंबनाच्या दिशेने वाटचाल करता यावी यासाठी केंद्र सरकार व राज्य सरकारच्या सहकार्याने लखपती दीदी हा उपक्रम राबवण्यात येत आहे.
लखपती दीदी अभियानामुळे जिल्ह्यातील हजारो महिलांचे जीवन बदलले आहे. स्वयं- सहाय्यता गट आणि आर्थिक मदतीच्या विविध योजनांच्या माध्यमातून या महिलांनी स्वतः चा व्यवसाय उभा केला आहे. यामुळे केवळ त्यांचे उत्पन्नच वाढले नाही, तर त्यांच्या कुटुंबांचेही जीवनमान उंचावले आहे. पालघर जिल्ह्यात महिलांना सक्षम बनवण्यासाठी आम्ही सर्वतोपरी प्रयत्न करत आहोत.
-भानुदास पालवे, मुख्य कार्यकारी अधिकारी, जिल्हा परिषद पालघर
पालघर : उद्दिष्ट १४,०००, यशस्वी महिला १२,२११
डहाणू : उद्दिष्ट १५, २५५, यशस्वी महिला ११,५४७
तलासरी : उद्दिष्ट ८,०००, यशस्वी महिला ६,८६२
वाडा : उद्दिष्ट ८,०००, यशस्वी महिला ६,५८६
विक्रमगड : उद्दिष्ट ८,०००, यशस्वी महिला ६, ५१७
जव्हार : उद्दिष्ट ८,०००, यशस्वी महिला ६,०३७
मोखाडा : उद्दिष्ट ८,०००, यशस्वी महिला ५, ६६३
वसई : उद्दिष्ट ४,०००, यशस्वी महिला ३,२३९
