नाशिक : स्मार्ट सिटी कंपनीच्या माध्यमातून शहरामधील विविध जलशुध्दीकरण केंद्र व जलकुंभांना स्काडा प्रणाली बसविण्यासाठी तसेच पावसाळी पूर्व कामांसाठी शनिवारी (दि. १०) शडटाऊन केले जाणार असल्याने संपूर्ण शहराचा पाणीपुरवठा बंद ठेवला जाणार आहे. रविवारी (दि. ११) देखील सकाळचा पाणीपुरवठा कमी दाबाने होणार आहे.
शहरातील विविध जलशुद्धीकरण केंद्रांमध्ये स्काडा प्रणाली बसविण्याचे काम प्रगतीपथावर सुरू असून, बाराबंगला जलशुद्धीकरण केंद्रातील नव्या सबस्टेशनची चाचणी स्मार्ट सिटी कंपनी करणार आहे. तसेच, गंगापूर धरणातील सबस्टेशनमध्ये देखभाल कामे होणार आहेत. त्यामुळे गंगापुर धरण व मुकणे धरण येथून या कालावधीत पंपीग करता येणार नसल्याने मनपाचे सर्व जलशुध्दीकरण केंद्र शनिवारी बंद ठेवले जाणार आहेत. त्यामुळे संपूर्ण शहराचा शनिवारचा पाणीपुरवठा बंद राहणार आहे. तसेच रविवारी सकाळी कमी दाबाने पाणीपुरवठा होईल, तरी नागरिकांनी सहकार्य करण्याचे आवाहन महापालिकेने केले आहे.
