नाशिकरोड : दीव्यांग मुलगी आणि मुलाच्या नावावर बक्षीसपत्राद्वारे प्लॉटची नोंद सातबाऱ्यावर करण्यासाठी एक हजार रुपयांची लाच स्वीकारणाऱ्या चेहडीच्या तलाठ्यास लाचलुचपत प्रतिबंधक विभागाच्या पथकाने रंगेहात पकडले. गौरव शंकर दवंगे (रा. अक्षर बंगला, निसर्ग नगर, म्हसरूळ) असे या संशयित लाचखोराचे नाव आहे.
चेहेडी गावातील एका वयोवृद्ध महिलेकडे सर्वे क्र. ४/१/ह/प्लॉट/११, क्षेत्रफळ ११९.५३१ चौ. मी. एवढा प्लॉट होता. वयोमानानुसार त्यांनी हा प्लॉट आपली दीव्यांग मुलगी व मुलाच्या नावावर बक्षीसपत्राद्वारे नोंदविला. याबाबत सर्व कागदपत्रे सादर करण्याचा अधिकार त्यांनी आपल्या बंधूला दिला होता. त्यानुसार त्यांनी दस्तऐवज चेहेडी तलाठी कार्यालयात दाखल केले असता तलाठी दवंगे यांनी सातबाऱ्यावर नोंद करण्यासाठी एक हजार रुपयांची लाच मागितली. याबाबत लाचलुचपत प्रतिबंधक विभागाकडे तक्रार करण्यात आली होती. त्यानुसार चेहेडी तलाठी कार्यालयात सापळा रचण्यात आला. ठरल्याप्रमाणे तक्रारदाराने पैसे दिले असता दवंगे यांनी ते स्वीकारले. त्याच क्षणी पथकाने कारवाई केली. याप्रकरणी नाशिकरोड पोलिस ठाण्यात गुन्हा दाखल झाला असून, विभागाच्या पोलिस निरीक्षक सुवर्णा हंडोरे या अधिक तपास करीत आहेत.
