येवला (नाशिक) : येथील पैठणी कलाकारी असोसिएशनला सामाईक सुविधा केंद्र उभारण्यासाठी महाराष्ट्र शासनाच्या उद्योग संचालनयामार्फत अंतिम मंजुरी देण्यात आली आहे. महाराष्ट्र राज्य औद्योगिक समूह विकास योजनेंतर्गत या केंद्राची उभारणी केली जाणार आहे. यासाठी बारा कोटी २३ लाख रुपयांच्या निधीची तरतूद करण्यात आली असून या सेंटरमुळे येवल्यातील पैठणी उद्योगाला मोठी चालना मिळणार आहे.
मंत्री छगन भुजबळ यांच्या विशेष प्रयत्नांतून पैठणी क्लस्टर साकारण्यात आले आहे. या पैठणी क्लस्टरमध्ये कॉमन फॅसिलिटी सेंटर उभारण्यासाठी त्यांचा शासनाकडे पाठपुरावा सुरू होता. नुकत्याच काही दिवसांपूर्वी राज्याच्या उद्योग विभागाचे प्रधान सचिवांसमवेत त्यांनी या केंद्राची पाहणी करत बैठक घेतली होती. यावेळी या केंद्राला अधिक निधी मंजूर करून सुविधा निर्माण करण्याच्या सूचना त्यांनी केल्या होत्या. त्यानुसार झालेल्या बैठकीत या निधीला मंजुरी देण्यात आली आहे. यात नऊ कोटी ७८ लाख रुपये अनुदान शासनाकडून तर उर्वरित रक्कम खासगी सहभाग आणि बँक कर्जाच्या माध्यमातून उभी केली जाणार आहे. या प्रकल्पाची अंमलबजावणी जिल्हा उद्योग केंद्र, नाशिक करणार असून देखरेख आणि परिणामकारक अंमलबजावणीसाठी उद्योग सहसंचालक नाशिक विभाग जबाबदार असणार आहेत.
या प्रकल्पा अंतर्गत वॉर्पिंग, रेशीम वळवण्याची सुविधा, रेशीम धागा रंगवणे, वाइंडिंग, उत्पादन डिझाइनिंग केंद्र, मूल्यवर्धन केंद्र, उत्पादन चाचणी सुविधा उपलब्ध होणार आहे. या प्रकल्पामुळे पैठणी वस्त्र उद्योगाला अधिक चालना मिळेल, रोजगाराच्या संधी वाढतील आणि आंतरराष्ट्रीय बाजारपेठेत स्थान मिळवण्याचा मार्ग सुकर होईल. तसेच सामाजिकदृष्ट्या दुर्बल घटकांतील अनुसूचित जाती-जमाती आणि महिला उद्योजकांनाही मदत करणार आहे.
