लासलगाव : येणाऱ्या काही राज्यांच्या विधानसभा निवडणुका डोळ्यासमोर ठेवून केंद्राने एनसीसीएफ व नाफेडच्या माध्यमातून फार्मर प्रोडूसिंग कंपनीमार्फत खरेदी केलेला कांदा आता दिल्लीतील ग्राहकांना मिळणार आहे. बुधवारी (दि. १६) दुपारी कसबे सुकेणे (ता. निफाड) येथून 42 बॉक्सची एक रॅक(1800टन) कांदा लोडिंग केला जात असून सात ते आठ दिवसानंतर सदर कांद्याचा दिल्ली ग्राहकांना लाभ मिळणार आहे.
एनसीसीएफ व नाफेडने कांदा भाव स्थिरीकरण योजनेअंतर्गत शेतकरी प्रोडूसिंग कंपनीकडून माल खरेदी केला. ज्यावेळी भाव चढे असतात तेव्हा हा कांदा ग्राहकांना स्वस्त दरात देण्याचा सरकारचा रास्त हेतू असतो. मात्र, लोडिंग होत असलेला कांदा हा नरम, ओला, खराब अवस्थेत असून याची टिकवण क्षमता फक्त चार ते पाच दिवस आहे. हा कांदा सात ते आठ दिवसानंतर दिल्ली ग्राहकांना मिळणार असल्याने तो ग्राहकांच्या उपयोगी पडणार नसल्याचा अंदाज जाणकारांनी व्यक्त केला आहे. यावेळी सोमठाण देश येथील कांदा उत्पादक शेतकरी गोरख संत यांनी कसबे सुकेणे येथे जाऊन लोडिंग होत असलेल्या कांद्याच्या गोण्या ओतून बघितल्या तो माल खराब असल्याचे त्यांना दिसून आल्याने शेवटी शेतकरी प्रोड्युसर कंपन्या सरकार बरोबर ग्राहकांची फसवणूक करत असल्याचे यावेळी त्यांनी सांगितले.
