नाशिकरोड : पुढारी वृत्तसेवा
लग्नापूर्वी एसबीआय बँकेत कॅशियर असल्याची खोटी माहिती देत विवाह केल्याचा प्रकार उघडकीस आल्यानंतर सासरच्या मानसिक छळाला कंटाळून २३ वर्षीय नवविवाहितेने गळफास घेऊन आत्महत्या केल्याची धक्कादायक घटना देवळाली गावातील वडारवाडीत घडली. या प्रकरणी उपनगर पोलिसांनी पतीसह तिघांवर गुन्हा दाखल केला असून, दोघांना अटक केली आहे.
निशा राजू पवार (२३) असे आत्महत्या केलेल्या नवविवाहितेचे नाव आहे. तिने मंगळवारी (दि. २८) सायंकाळी राहत्या घरी गळफास घेऊन आत्महत्या केली. या प्रकरणी तिचे भाऊ राहुल अशोक शिंदे (रा. नाशिक वेस, बारादारी रोड, सिन्नर) यांनी दिलेल्या फिर्यादीवरून उपनगर पोलीस ठाण्यात पती राजू गंगाराम पवार, अमोल राजू गायकवाड आणि सविता पवार यांच्यावर आत्महत्येस प्रवृत्त करणे व फसवणुकीसह विविध कलमान्वये गुन्हा दाखल केला आहे. निशा आणि राजू यांचा विवाह अवघ्या दोन महिन्यांपूर्वी झाला होता.
विवाह ठरवताना राजू याने आपण एसबीआय बँकेत कॅशियर म्हणून कार्यरत असल्याचे सांगितले होते. मात्र, लग्नानंतर तो प्रत्यक्षात एका मॉलमध्ये काम करत असल्याचे समोर आले. घटनेची माहिती मिळताच उपनगर पोलिसांनी तातडीने तपास सुरू करत पती राजू गंगाराम पवार (२७) आणि अमोल राजू गायकवाड (३०, रा. राणेनगर) यांना अटक केली आहे. या प्रकरणाचा पुढील तपास पोलीस उपनिरीक्षक सपकाळे करीत आहेत.
या फसवणुकीमुळे आणि सासरच्या मंडळींकडून होत असलेल्या मानसिक त्रासामुळे निशा नैराश्यात गेली होती. अखेर २८ जुलै रोजी सायंकाळी ४.३० च्या सुमारास तिने टोकाचे पाऊल उचलल्याचे फिर्यादीत नमूद केले आहे.
