बोरगाव : सुरगाणा तालुक्यातील बोरगाव घाटमाथा परिसरात शनिवारी (दि.२५) सकाळी भूकंपाचे सलग चार सौम्य धक्के जाणवल्याने नागरिकां काही काळ भीतीचे वातावरण निर्माण झाले. पहिला मोठा धक्का सकाळी ९.५५ बसला. त्याची तीव्रता ३ रिश्टर स्केल इतकी असल्याचे प्रशासनाने सांगितले.
भूकंपाची माहिती मिळताच जिल्हाधिकारी आयुष प्रसाद, कळवणच्या प्रकल्प अधिकारी तथा सहायक जिल्हाधिकारी काश्मिरा संख्ये, तहसीलदार रामजी राठोड व पोलिस निरीक्षक विनोद पाटील यांच्यासह मंडळ अधिकारी व तलाठ्यांनी अनेक गावांना भेट देत पाहणी केली.
सुरगाणा तालुक्यातील बोरगाव, सराड, घागबारी, हतगड, भिंतबारी, राहुडे, मांजरापाडा, शिवपाडा, शिंदे दिगर, हरणटेकडी, वांजूळपाडा, रोटी अशा २० ते २५ गावांमध्ये हे धक्के जाणवले. यासह दिंडोरीतील भनवड येथेही धक्के जाणवले. भूकंपाचे धक्के जाणवताच अनेक नागरिक घराबाहेर पडले. दुसरा धक्का १०.०१ वाजता बसला.
सुदैवाने या घटनेत कोणतीही जीवित किंवा वित्तहानी झाल्याचे वृत्त नाही. मात्र, अचानक झालेल्या धक्क्यांमुळे नागरिकांत काही काळ घबराट पसरली होती. या भूकंपाचा केंद्रबिंदू गुजरातमधील वापी परिसरात असल्याचे समजते. अफवांवर विश्वास न ठेवण्याचे आवाहन तहसीलदार रामजी राठोड यांनी केले आहे.
