सिन्नर : येथील बाराव्या शतकातील अतिप्राचीन व हेमाडपंतीय स्थापत्य कलेचा उत्कृष्ट नमुना असलेल्या गोंदेश्वर मंदिर तसेच सिन्नर-शिर्डी रस्त्यावर असलेल्या मुक्तेश्वर मंदिर येथे किरणोत्सव सोहळा सुरू असून, या अद्भुत दृश्याने भाविक मंत्रमुग्ध होत आहेत, गेल्या काही दिवसांपासून सूर्योदयावेळी सूर्यकिरणे मंदिराच्या रचनेतून थेट गाभाऱ्यात प्रवेश करीत महादेवाच्या पिंडीवर पडत आहेत.
गोंदेश्वर मंदिरात नंदी मंदिरातून येणारी किरणरेषा सभामंडप ओलांडून गाभाऱ्यात पोहोचते, तर मुक्तेश्वर मंदिरातही याचप्रमाणे सूर्यकिरणांचा अभिषेक होत आहे. काही क्षणांसाठी चालणारा हा 'सूर्याभिषेक' भाविकांसाठी विशेष आकर्षण ठरत आहे. या दोन्ही मंदिरांनी शेकडो वर्षांचा इतिहास जपत धार्मिक व सांस्कृतिक परंपरेचे जतन केले आहे.
सूर्याच्या उत्तरायण दक्षिणायण प्रवासातील विशिष्ट काळातच हा किरणोत्सव अनुभवता येत असल्यामुळे त्याला धार्मिक व वैज्ञानिक महत्त्व आहे. या दुर्मीळ सोहळ्याचा लाभ घेण्यासाठी भाविकांनी उपस्थित राहावे, असे आवाहन करण्यात आले आहे.
मुक्तेश्वर मंदिराच्या कामाला सुरुवात
तालुक्यातील प्रसिद्ध मुक्तेश्वर मंदिराच्या जीर्णोद्धार व विकासकामांना अखेर सुरुवात करण्यात आली आहे. मंदिर परिसर सुशोभीकरण, दुरुस्ती तसेच भाविकांसाठी आवश्यक सोयी सुविधा उपलब्ध करून देण्यावर भर दिला जाणार आहे. याबाबत स्थानिक नागरिक व भाविकांमध्ये समाधान व्यक्त होत असून, या कामांमुळे मंदिराचा परिसर अधिक आकर्षक होणार आहे.
