जळगाव: शेतातील लाकडाची वाहतूक करणाऱ्या वाहनावर कायदेशीर कारवाई न करण्यासाठी तब्बल 2 लाख 50 हजार (2,50,000 रुपये) लाचेची मागणी करणाऱ्या पारोळ्याच्या महिला वनपालसह (Forest Guard) एका वन कर्मचाऱ्याला आणि एका खासगी इसमाविरुद्ध लाचलुचपत प्रतिबंधक विभागाने (ACB) गुन्हा दाखल केला आहे.
विशेष म्हणजे, तडजोडीअंती 1 लाख रुपये (एक लाख रुपये) लाचेची मागणी केल्याचे 'एसीबी'च्या पडताळणीत निष्पन्न झाले आहे. नाशिक/जळगाव घटक अंतर्गत लाचलुचपत प्रतिबंधक विभागाने ही कारवाई केली असून, पारोळा पोलीस ठाण्यात गुन्हा नोंद करण्यात आला आहे.
तक्रारदारांचा भाऊ शेतातील निंबाचे तोडलेले लाकूड मालवाहनावर (ट्रक) घेऊन जात असताना, १४ तारखेला वनपाल वैशाली गायकवाड, एका वन विभागाचा कर्मचारी आणि श्रीकृष्ण सॉ मिलचा मालक सुनिल धोबी यांनी सावित्री फटाके फॅक्टरीसमोर ट्रक पकडली. वनपाल वैशाली गायकवाड यांनी 'बेकायदेशीर लाकूड वाहतूक' करत असल्याचे कारण सांगून वाहन जप्त केले आणि ते श्रीकृष्ण सॉ मिल, पारोळा येथे लावून दिले.
गाडी सोडण्याच्या मोबदल्यात सुरुवातीला 2.5 लाखाची लाच मागण्यात आली. तक्रारदाराच्या विनंतीनंतर, वनपाल वैशाली गायकवाड व वनविभागाच्या कर्मचाऱ्याने तडजोड केली आणि 1 लाख रुपये (एक लाख रुपये) ही रक्कम खासगी इसम सुनिल धोबी याच्याकडे देण्यास सांगितले.
तक्रारदार यांनी थेट लाचलुचपत प्रतिबंधक विभागाकडे तक्रार दिली. त्यानुसार, पंच साक्षीदारांसमक्ष लाचेच्या मागणीची पडताळणी करण्यात आली. या पडताळणी दरम्यान, पकडलेल्या वाहनाविरुद्ध कोणतीही कायदेशीर कारवाई न करण्याच्या मोबदल्यात वनपाल वैशाली गायकवाड, वनविभागाचा कर्मचारी आणि खासगी इसम सुनिल धोबी यांनी 1 लाखाची लाच मागितल्याचे सिद्ध झाले. त्यानंतर तिन्ही आरोपींविरुद्ध गुन्हा दाखल करण्यात आला आहे. ही कारवाई नाशिक परिक्षेत्राचे पोलीस अधीक्षक भारत तांगडे, अपर पोलीस अधीक्षक माधव रेड्डी व अपर पोलीस अधीक्षक सुनिल दोरगे यांच्या मार्गदर्शनाखाली पोलीस उपअधीक्षक योगेश ठाकुर, पोलीस निरीक्षक नेहा तुषार सुर्यवंशी आणि त्यांच्या पथकाने केली.
