नाशिक : येथे उभारल्या जाणाऱ्या छत्रपती शाहू महाराज संशोधन, प्रशिक्षण व मानव विकास संस्थेच्या (सारथी) विभागीय कार्यालयाच्या इमारतीचे भूमिपूजन मुख्यमंत्री एकनाथ शिंदे यांच्या हस्ते करण्यात आले. यावेळी उपमुख्यमंत्री देवेंद्र फडणवीस, पालकमंत्री दादा भुसे आदी उपस्थित होते. यावेळी कोनशिला अनावरणही करण्यात आले.
त्र्यंबक नाका येथील सार्वजनिक बांधकाम विभाग कार्यालयासमोर मराठा समाजातील 500 विद्यार्थी व 500 विद्यार्थिनींसाठी १५६ कोटी रुपये खर्चून १० मजली सारथी या संस्थेचे वसतिगृह तसेच संस्थेचे विभागीय कार्यालय उभारले जाणार आहे. ४३ कोटी खर्चून धनगर समाजातील 100 विद्यार्थी व 100 विद्यार्थिनींसाठी वसतिगृह व कार्यालय इमारत उभारली जाणार आहे. या व्यतिरिक्त २५ कोटी रुपये खर्चून वनभवन इमारतही बांधली जाणार असून, या सर्व बांधकामांचे भूमिपूजन मुख्यमंत्री शिंदे आणि उपमुख्यमंत्री फडणवीस यांच्या हस्ते करण्यात आले. या प्रसंगी आमदार देवयानी फरांदे, सीमा हिरे, ॲड. राहुल ढिकले, माजी मंत्री महादेव जानकर, माजी खासदार हेमंत गोडसे आदी उपस्थित होते. याप्रसंगी सकल मराठा समाजबांधव व सकल धनगर समाजबांधव यांच्या हस्ते मुख्यमंत्री शिंदे, उपमुख्यमंत्री फडणवीस यांचा सत्कार करण्यात आला. तसेच आमदार फरांदे यांनी केलेल्या विविध विकासकामांवर आधारित 'विकास पर्व' या पुस्तिकेचे अनावरणही करण्यात आले.
त्र्यंबक रोडवरील हुतात्मा अनंत कान्हेरे (गोल्फ क्लब) मैदानाचे १२ कोटी रुपये खर्चून नूतनीकरण तसेच दुसऱ्या टप्प्यात महिला रुग्णालय, इंदिरानगर बोगदा रुंदीकरण करण्याचेही भूमिपूजन यावेळी करण्यात आले.
