Nashik MVP Marathon | मविप्र मॅरेथॉनासाठी ऑनलाइन नोंदणी सुरू
नाशिक : नवव्या राष्ट्रीय व 14 व्या राज्यस्तरीय मविप्र मॅरेथॉनमध्ये सहभागी होण्यासाठी मंगळवार (दि.10) पासून ऑनलाइन नोंदणीला प्रारंभ झाला. 12 जानेवारी 2025 रोजी पहाटे 5:30 वाजता होणाऱ्या मॅरेथॉनमध्ये अधिकाधिक स्पर्धकांनी सहभागी व्हावे, असे आवाहन मविप्रचे सरचिटणीस तथा आयोजन समितीचे अध्यक्ष ॲड. नितीन ठाकरे यांनी केले.
'रन फॉर हेल्थ ॲण्ड बिल्ड द नेशन' हे ब्रिदवाक्य घेऊन यंदा ही स्पर्धा होत आहे. मॅरेथॉनसाठीची नोंदणी प्रक्रिया यंदा ऑनलाइन आहे. क्यूआरकोड व ऑनलाइन लिंक त्यासाठी तयार आहे. ऑनलाइन नोंदणी येत्या ९ जानेवारीला सायं. ५ वाजता बंद होईल. अधिक माहितीसाठी https://www.nashikmvpmarathon.org/marathon/ या वेबसाईटवर संपर्क साधावा, असे आवाहन करण्यात आले. यंदा बक्षिसांच्या रकमेत वाढ करण्यात असून, पाच हजार रुपयांपासून ते दीड लाखांपर्यंत अशी एकूण साडेआठ लाखांची बक्षिसे जिंकण्याची संधी मिळणार आहे.
सहभागी प्रत्येकालाच प्रमाणपत्र
मॅरेथॉनमध्ये सहभागी स्पर्धकांसाठी निवास, भोजनाची व्यवस्था करण्यात आली आहे. ऑनलाइन नोंदणी करणाऱ्या स्पर्धकाला आकर्षक टी शर्ट, फलाहार, अल्पोपाहार दिला जाईल. प्रत्येक सहभागी स्पर्धकाला प्रमाणपत्र व पदक, तर विजेत्याला ट्रॉफी, रोख स्वरूपातील बक्षीस, प्रमाणपत्र व पदक देऊन सन्मानित केले जाईल.
'अशी' असेल स्पर्धा
मॅरेथॉनसाठी 14 गट तयार करण्यात आले असून, 5 किमीपासून ते 42.195 किमी असे अंतर नियोजित आहे. फूल मॅरेथॉन (42.195 किमी), हाफ मॅरेथॉन (21.097 किमी) आणि खुली (10 किमी) असेल यासाठी वयाची अट नाही.
60 वर्षांवरील (पुरुष) ज्येष्ठ नागरिकांसाठी 5 किमी अंतर असेल.
सर्व वयोगटातील महिलांसाठी 10 किमी
35 वर्षापुढील महिलांसाठी 5 किमी अंतर असेल.
कुठल्याही शाळा-महाविद्यालयांतील 14, 17, 19 आणि 25 वर्षांआतील मुले आणि मुलींसाठी स्पर्धा खुली आहे.
