नाशिक : प्रतिनिधी
नाशिकरोड येथील सिन्नर फाटा परिसरात एकावर रॉडने प्राणघातक हल्ला केल्याची घटना शुक्रवारी सायंकाळी घडली. या हल्ल्यात प्रमोद रामदास वाघ (38) याचा मृत्यू झाला आहे.
सिन्नर फाटा परिसरात यश टायर दुकान असून तेथे ही घटना घडली. सायंकाळी सहाच्या सुमारास प्रमोद वाघ हे सर्व्हिस रोडने दुचाकीने जात होते. यावेळी संशयित योगेश पगारे व त्याच्या साथीदारांनीं प्रमोद यांना अडविले. जुन्या भांडणाची कुरापत काढून वाद घालण्यास सुरुवात केली. त्यावेळी एकाने वाघ याच्यावर रॉडने हल्ला केला. त्यात वाघ गंभीर जखमी झाला. त्याला उपचारासाठी परिसरातील खाजगी रुग्णालयात दाखल करण्यात आले. मात्र उपचारादरम्यान वाघ यांचा मृत्यू झाला.
जागेच्या वादातून हा हल्ला झाल्याची चर्चा आहे. घटनेची माहिती मिळतात नाशिकरोड पोलीस ठाण्याचे अधिकारी व कर्मचारी यांनी घटनास्थळी धाव घेतली. पोलिसांनी हल्लेखोरांचा शोध घेण्यास सुरुवात केली आहे.
