धुळे: महिलेसमवेत अनैतिक संबंध असल्याच्या संशयातून तरुणाचा धारदार शस्त्राने खून करणाऱ्या दोघांना शिरपूर तालुका पोलिसांनी बेड्या ठोकल्या आहेत. हा खून झाल्यानंतर अवघ्या 24 तासात खुनाच्या आरोपींना गजाआड करण्यात पोलिसांना यश आले आहे.
शिरपूर तालुक्यातील कोडीद शिवारातील तेल्यामहु येथे राहणारा नानासिंग साहेज्या पावरा (वय 26) याचा तेल्यामहु गावाच्या नाल्याजवळ मृतदेह आढळून आला होता. हा मृतदेह रक्ताच्या थारोळ्यात असल्यामुळे त्याचा अज्ञात व्यक्तीने खून केल्याचे प्राथमिक तपासात उघड झाले. अज्ञात व्यक्तीने धारदार चाकुने गंभीर जखमी करुन त्याला जीवे ठार मारले होते.
याबाबत मयताचा भाऊ लक्ष्मण सोहज्या पावरा यांनी फिर्याद दिली. त्यावरुन शिरपूर तालुका पोलीस ठाणे येथे भारतीय न्याय संहिता 2023 चे कलम 103 (1) प्रमाणे गुन्हा दाखल करण्यात आला होता. गुन्हा घडल्याचे ठिकाण हे कोडीदपासुन २ किमी अंतरावर दुर्गम भागात असल्याने व गुन्हा रात्रीच्या वेळी निर्जन स्थळी घडला असल्याने गुन्हा उघडकीस आणुन आरोपीचा शोध घेणे अत्यंत कठीण होते. या गुन्ह्याचा तपास करीत असताना पोलीस निरीक्षक जयपाल हिरे यांनी महत्त्वाची माहिती गोळा केली.
या प्रकरणात मयत नानासिंग पावरा याचे मुकेश रुपसिंग पावरा याच्या पत्नीशी अनैतीक संबंध असल्याची गोपनिय माहिती मिळाल्यानंतर मुकेश पावरा यास ताब्यात घेत मागील अनेक तासापासुन सखोल विचारपुस सुरु होती. परंतु मुकेश पावरा याने पोलीसांना कोणतेही सहकार्य न करता गुन्ह्याबाबत कोणतीही माहिती दिली नव्हती.
दरम्यान एका प्रत्यक्षदर्शी साक्षीदाराच्या माहितीवरुन मुकेश पावरा याच्यासोबत या गुन्ह्यात बागलसिंग नानुराम पावरा हा देखील सहभागी असल्याची माहिती मिळाली. त्यामुळे बागलसिंग नानुराम पावरा याला विचारपुस करण्यात आली. यात दोन्ही आरोपींच्या उत्तरात तफावत येत असल्याने त्यांना स्वतंत्रपणे पुन्हा पुन्हा वेगवेगळे प्रश्न विचारले. यात दोन्ही आरोपी गोंधळल्याने त्यांनी संगनमताने खुन केल्याची कबुली दिली. अशाप्रकारे हा गुन्हा 24 तासात उघड करुन दोन्ही आरोपींना ताब्यात घेण्यात शिरपूर तालुका पोलीसांना यश आले आहे.
