नाशिक : निवडणूक होणाऱ्या स्थानिक स्वराज्य संस्थेच्या मतदान क्षेत्रात कार्यरत असलेल्या सर्व मतदार कामगार, अधिकारी व कर्मचाऱ्यांना मतदानाचा हक्क बजावता यावा, यासाठी संबंधित उद्योजक व आस्थापनांनी त्यांच्या उद्योगात, आस्थापनेत कार्यरत मतदार कामगार, अधिकारी, कर्मचाऱ्यांना मतदानासाठी भरपगार सुट्टी अथवा दोन तासांची सवलत द्यावी, असे आवाहन नाशिक विभागाचे कामगार उपायुक्त वि. ना. माळी यांनी केले आहे.
अपवादात्मक परिस्थितीत कामगार, अधिकारी व कर्मचाऱ्यांना पूर्ण दिवस सुट्टी देणे शक्य नसेल तर मतदान क्षेत्रातील कामगारांना मतदानाचा हक्क बजावण्यासाठी सुट्टी ऐवजी केवळ दोन ते तीन तासांची सवलत देता येईल.याबाबत संबंधित जिल्हाधिकारी तथा जिल्हा निवडणूक अधिकारी यांची पूर्व परवानगी घेणे आवश्यक राहील.
कोणत्याही परिस्थितीत मतदारांना मतदानासाठी किमान दोन ते तीन तासांची सवलत मिळेल, याची दक्षता संबंधित आस्थापना मालकांनी घेणे आवश्यक राहील. उद्योग, ऊर्जा व कामगार विभागांतर्गत येणाऱ्या सर्व आस्थापना, कारखाने, दुकानांच्या व्यवस्थापकांनी या निर्णयाचे अनुपालन काटेकोरपणे होईल याची खबरदारी घ्यावी.
मतदारांकडून मतदानासाठी सुट्टी अथवा सवलत प्राप्त न झाल्याने मतदान करता येणे शक्य न झाल्याबाबत तक्रार आल्यास संबंधितांविरुद्ध कारवाई करण्यात येईल.
