नाशिक : पुढारी वृत्तसेवा
सिंहस्थ कुंभमेळा २०२७ च्या पार्श्वभूमीवर सुरू असलेल्या विकासकामांमध्ये अडथळे आणि वादाच्या चर्चांना उधाण आले असतानाच नाशिक महापालिका प्रशासनाने सारवासारव करत सर्व कामे सुरळीत सुरू असल्याचा दावा केला आहे.
सिंहस्थ कुंभमेळ्याच्या कामांत काही नगरसेवक अडथळा आणत असल्याच्या तक्रारीत पोलिसांच्या हस्तक्षेपानंतर वातावरण तापले असताना महापालिकेचे शहर अभियंता संजय अग्रवाल यांनी निवेदन प्रसिद्ध करत या प्रकरणावर पडदा टाकण्याचा प्रयत्न केला आहे.
शहरातील विविध कामे संबंधित लोकप्रतिनिधी, अधिकारी आणि ठेकेदार यांच्या समन्वयातूनच सुरू असल्याचे स्पष्ट करत सर्व नगरसेवकांच्या सहकायनि आणि मक्तेदारांशी समन्वय साधून कामे नियोजनानुसार प्रगतिपथावर आहेत. नगरसेवक आणि मक्तेदार यांच्यात कोणताही गैरसमज नाही, असे या पत्रात नमूद करण्यात आले आहे.
अलीकडेच पंचवटीसह काही भागांमध्ये सिंहस्थाशी संबंधित कामांमध्ये अडथळे, ठेकेदारांना त्रास आणि वाद निर्माण झाल्याच्या तक्रारी समोर आल्या होत्या. या पार्श्वभूमीवर प्रशासनाने हे स्पष्टीकरण देत परिस्थिती नियंत्रणात असल्याचे दाखवण्याचा प्रयत्न केल्याचे मानले जात आहे.
दरम्यान, प्रत्यक्षात घडलेल्या घटनांमुळे निर्माण झालेल्या प्रश्नचिन्हांमुळे प्रशासनाच्या या भूमिकेकडे संशयाने पाहिले जात असून, आगामी काळात या कामांच्या अंमलबजावणीवर लक्ष ठेवले जाणार आहे.
