Nashik Industry News | जिल्ह्यात उद्योगांसाठी शेकडो हेक्टर जागा

नाशिक : जिल्ह्यात उद्योगांसाठी तब्बल शेकडो हेक्टर जागा उपलब्ध असून, मोठ्या समुहाची गुंतवणूक देण्यासाठी प्रयत्नशील असल्याचे आश्वासन विकास आयुक्त (उद्योग) दीपेंद्र कुशवाह यांनी दिली. निमा आणि उद्योग विभागातील वरिष्ठ अधिकारी यांच्यात झालेल्या व्हिडीओ कॉन्फरन्सिंग बैठकीमध्ये आयुक्त कुशवाह यांनी जिल्ह्यात उद्योगांसाठी उपलब्ध असलेल्या जागेचा आढावा घेतला. बैठकीसाठी अतिरिक्त विकास आयुक्त (उद्योग) प्रदीप चंद्रन हे देखील उपस्थित होते.

उद्योगासाठी नाशिक जिल्हा पोषक असून, भविष्यात मोठ्या गुंतवणुकीसाठी पावले उचलली जातील. तसेच प्रलंबित विषयांवर तातडीने निर्णय घेणार असल्याचे आयुक्त कुशवाह यांनी स्पष्ट केले. यावेळी निमा अध्यक्ष आशिष नहार यांनी, कायमस्वरुपी प्रदर्शन केंद्र, जिल्ह्याच्या लॉजिस्टिक्स क्षेेत्रासाठी महत्त्वपूर्ण असलेल्या निफाड ड्रायपोर्ट प्रकल्पातील अडचणी सोडविण्यात याव्यात, आयटी उद्योगासाठी जऊळके परिसरात तीनशे एकर जागर असल्याने, याठिकाणी उद्योग यावेत आदी मागण्या केल्या. त्यावर बंगळुरू आणि हैदराबाद येथील नामवंत कंपन्यांच्या शाखा नाशिकमध्ये आणण्यासाठी प्रयत्न करावेत, अशा सूचना आयुक्त कुशवाह यांनी दिल्या. तसेच पुढील दावोस समिटमध्ये नाशिककडे विशेष लक्ष देणार असल्याचेही त्यांनी यावेळी स्पष्ट केले. यावेळी निमा सचिव राजेंद्र अहिरे, उपाध्यक्ष किशोर राठी, मनीष रावल, हेमंत खोंड, नितीन आव्हाड, सचिन कंकरेज, सतीश काेठारी उपस्थित होते.