नाशिक : परदेशात पाठवलेल्या पार्सलमध्ये एमडी व इतर आक्षेपार्ह साहित्य सापडल्याची भीती घालून भामट्यांनी शहरातील सेवानिवृत्त व्यक्तीस २७ लाख रुपयांचा गंडा घातला आहे. भामट्यांनी ३० डिसेंबर ते २ जानेवारीदरम्यान हा गंडा घातला.
आडगाव येथील कोणार्कनगर परिसरातील ६४ वर्षीय व्यक्तीस संशयितांनी फसवले. सेवानिवृत्त व्यक्तीच्या फिर्यादीनुसार, भामट्यांनी त्यांना मोबाइलवरून संपर्क साधला. तसेच तुम्ही परदेशात पाठवलेल्या पार्सलमध्ये एमडी व इतर आक्षेपार्ह साहित्य सापडले आहेत, असे सांगितले. तुमच्याविरोधात गुन्हा दाखल करण्यात आल्याचे भामट्यांनी सांगितले. त्यामुळे तक्रारदार घाबरले. त्यानंतर भामट्यांनी तक्रारदारास बँक खात्याची माहिती जाणून घेण्याच्या बहाण्याने २७ लाख रुपये स्वत:च्या बँक खात्यात वर्ग करून घेतले. त्यानंतर फसवणूक झाल्याचे लक्षात आल्यानंतर तक्रारदाराने सायबर पोलिसांकडे धाव घेत संशयितांविराेधात फिर्याद दाखल केली आहे.
