नाशिक : तुमच्या आधारकार्डवरून संशयास्पद आर्थिक व्यवहार झाले असून, मनी लाँड्रिंग झाल्याचा आरोप करीत भामट्यांनी शहरात भाडेतत्त्वाने राहणाऱ्या ८० वर्षीय वृद्धास सुमारे सात कोटी रुपयांचा गंडा घातला. तक्रार मिळताच सायबर पोलिसांनी तांत्रिक विश्लेषणाद्वारे तपास करीत सातपैकी तीन कोटी रुपयांचे व्यवहार गोठवले आहेत.
मुंबईतील खार परिसरात हे ८० वर्षीय वृद्ध मुलासह राहतात. संबंधित वृद्धाने खार येथील स्थावर मालमत्ता विक्री करून त्यातून आलेले पैसे विविध बँक खात्यांमध्ये ठेवले होते. तसेच ते नाशिकला भाडेतत्त्वाने राहतात. २४ ऑगस्ट ते ४ सप्टेंबर २०२४ या कालावधीत भामट्यांनी वृद्धाशी संपर्क साधून, 'आम्ही पोलिस आहोत', असे सांगितले. तसेच वृद्धाचे आधारकार्ड नंबर सांगत या आधारकार्डसह वेगवेगळ्या बँक खात्यांतून तुम्ही मनी लाँड्रिंग केल्याचे म्हटले. त्यामुळे सीआयडी, सक्तवसुली संचलनालय (ईडी) आणि सीबीआय तुमच्यावर कारवाई करणार आहेत. तुम्हाला अटक करण्याची प्रक्रिया सुरू आहे असे सांगत, ईडी, सीबीआयचा बनावट सही- शिक्का, लोगो असलेली कागदपत्रे, अटक वॉरंट वृद्धाला पाठवले होते. त्यामुळे वृद्ध घाबरले. त्यांनी कारवाईच्या भीतीपोटी भामटे सांगतील तसे केले. त्याचा फायदा घेत भामट्यांनी या वृद्धाच्या बँक खात्यातून सहा कोटी ९० लाख ८० हजार रुपये वेगवेगळ्या बँक खात्यात घेतले. मात्र, वृद्धाने वेळीच याची माहिती सायबर पोलिसांना दिल्याने पोलिसांनी घटनेचे गांभीर्य ओळखून आर्थिक व्यवहारांचा माग काढत त्यापैकी तीन कोटी रुपयांचे व्यवहार थांबवले. न्यायालयीन प्रक्रियेनंतर हे पैसे वृद्धास परत मिळतील.
