सिडको : पुढारी वृत्तसेवा
अल्पवयीन मुलीला आमिष दाखवून पळवून नेण्याचा प्रयत्न केल्याप्रकरणी तसेच तिच्याकडून अश्लील छायाचित्रे आणि चित्रफिती तयार करण्यास भाग पाडल्याप्रकरणी पश्चिम बंगालमधील तरुणाविरुद्ध एमआयडीसी पोलिस ठाण्यात पोक्सो आणि माहिती-तंत्रज्ञान कायद्यान्वये गुन्हा दाखल करण्यात आला आहे.
याबाबत एमआयडीसी पोलिसांनी दिलेल्या माहितीनुसार, संशयित सायन सुकांत घोष (रा. कोलकाता, पश्चिम बंगाल) याने अल्पवयीन मुलीशी संपर्क साधून तिला फूस लावली. संबंधित मुलगी घरातून निघून गेल्यानंतर कुटुंबीयांनी तिचा शोध घेतला असता ती नाशिकरोड रेल्वेस्थानक परिसरात आढळून आली.
कुटुंबीयांनी तिला घरी आणून विचारपूस केली असता आरोपीने तिला रेल्वेने प्रवास करून इटारसी येथे येण्यास सांगितल्याचे तिने सांगितले. तसेच त्र्यंबक रोडलगत असलेल्या एका हॉटेल परिसरातून आरोपीने मुलीला विविध आमिष दाखवून पळवून नेण्याचा प्रयत्न केला.. तिच्याकडून अश्लील छायाचित्रे व चित्रफिती तयार करून ते पाठविण्यास भाग पाडल्याचेही फिर्यादीत नमूद करण्यात आले. या प्रकरणी एमआयडीसी पोलिस ठाण्यात गुन्हा दाखल करण्यात आला असून, एमआयडीसी पोलिस ठाण्याचे वरिष्ठ पोलिस निरीक्षक संतोष नरुटे तपास करत आहेत.
