सिडको ( नाशिक ) : नाशिक महानगरपालिकेच्या आगामी सार्वत्रिक निवडणुकीच्या पार्श्वभूमीवर अंबड गावातील ग्रामस्थांची बैठक घेण्यात आली. या बैठकीत निवडणूक प्रक्रियेदरम्यान शांतता, सुव्यवस्था व कायदा-सुव्यवस्था अबाधित राखण्यासाठी विविध महत्त्वाचे ठराव सर्वानुमते मंजूर करण्यात आले.
बैठकीत गुन्हेगारी पार्श्वभूमी असलेल्या उमेदवारांना मतदान न करण्याचा निर्णय घेण्यात आला. निवडणूक काळात कोणत्याही पक्षाच्या उमेदवाराने किंवा त्यांच्या कार्यकर्त्यांनी समाजात तेढ निर्माण होईल, असे गैरवर्तन केल्यास संबंधित उमेदवाराच्या विरोधात ग्रामस्थांकडून तीव्र आंदोलन छेडण्यात येईल असा ठराव ही मंजुर करण्यात आल्याची माहिती ग्रामस्थ साहेबराव दातीर यांनी दिली.
निवडणूक आयोगाने जाहीर केलेल्या आदर्श आचारसंहितेचे उमेदवारांनी काटेकोर पालन करावे, अन्यथा कायदेशीर कारवाई करण्यात यावी, अशी मागणी बैठकीत करण्यात आली. तसेच निवडणूक काळात कोणत्याही शासकीय अधिकाऱ्याने एखाद्या उमेदवाराच्या समर्थनार्थ काम केल्यास किंवा ईव्हीएम मशीन संदर्भात कोणतीही छेडछाड झाल्यास संबंधित अधिकाऱ्यावर कठोर कारवाई करण्याची मागणी करण्यात आली.
मतदान प्रक्रियेदरम्यान पैशांचा वापर करून मतदारांना प्रभावित करण्याचे प्रकार आढळल्यास संबंधित उमेदवार व पक्षाविरोधात निषेध आंदोलन करण्यात येईल, असा ठरावही बैठकीत मंजूर करण्यात आला. मतदानाच्या दोन दिवसांपूर्वी तसेच मतदानाच्या दिवशी पोलिस प्रशासनाच्या मदतीने विशेष पथके तयार करून अंबड परिसरात कडक बंदोबस्त ठेवण्यात येणार असल्याचे स्पष्ट करण्यात आले. हे सर्व ठराव जिल्हाधिकारी, निवडणूक आयोग, पोलीस आयुक्त, महापालिका आयुक्त तसेच अंबड पोलीस ठाण्याच्या वरिष्ठ अधिकाऱ्यांना कळविण्यात आले आहेत. यावेळी साहेबराव दातीर, महेश शिरसाट, शांताराम फडोळ, जगदीश दातीर, त्र्यंबक मोरे, अजित दोंदे, विष्णू दातीर, शरद कर्डिले, सचिन इंगोले यांच्यासह अंबड गावातील ग्रामस्थ उपस्थित होते.
