नाशिक : नाशिक - पुणे रोडवरील धर्मादाय सहआयुक्त कार्यालयात १० हजारांची लाच घेताना लाचलुचपत प्रतिबंधक विभागाने दोघांना रंगेहाथ पकडले.
धर्मादाय सहआयुक्तालयातील न्याय लिपिक सुमंत सुरेश पुराणिक (४०, रा. श्री निधी बंगला, डीजीपीनगर -1, नाशिक - पुणे रोड), लघुलेखक संदीप मधुकर बाविस्कर (४७, रा. रायगड चौक, सिडको) अशी दोघा संशयित लाचखोरांची नावे आहेत.
तक्रारदारांकडे नवीन दाखल फाइलच्या नेमलेल्या तारखा देणे, सुनावणी कामकाजात अडवणूक न करणे, निकाली फाइल नकला विभागाला वेळेत पाठविणे, पुढील सुनावणी कामकाजात अडथळा न आणता कामकाज जलद गतीने करून देण्याच्या मोबदल्यात पुराणिक याने तक्रारदाराकडे दि. २३ सप्टेंबर रोजी २० हजार रुपयांच्या लाचेची मागणी केली होती. तडजोडीअंती १५ हजार लाच देण्याचे ठरले होते. त्यासाठी लघुलेखक बाविस्कर याने लाच घेण्यास प्रोत्साहन दिले होते. तक्रारदाराने लाचलुचपत प्रतिबंधक विभागाकडे तक्रार केली असता, शहानिशा करून सापळा रचण्यात आला होता. मंगळवारी (दि. १) द्वारका येथील धर्मादाय सहआयुक्त कार्यालयात पंच व साक्षीदारांसमक्ष लाचखोरांनी लाचेची रक्कम घेतली असता, त्यांना रंगेहाथ पकडण्यात आले. याप्रकरणी मुंबई नाका पोलिसांत गुन्हा दाखल करण्यात आला आहे. विभागाच्या अधीक्षक शर्मिष्ठा वालावलकर, अपर अधीक्षक माधव रेड्डी, पोलिस निरीक्षक स्वप्निल राजपूत यांच्या मार्गदर्शनाखाली पोलिस निरीक्षक नितीन पाटील, पोलिस नाईक विनोद चौधरी, अनिल गांगोडे यांनी ही कारवाई केली.
