Mukhyamantri Saur Krushi Vahini Yojana – 2.0
नाशिक : ‘मुख्यमंत्री सौर कृषी वाहिनी योजना-2.0’ च्या माध्यमातून नाशिक जिल्ह्यातील कृषी वाहिन्या सौर ऊर्जित करून शेतकऱ्यांना दिवसा वीज देण्यासाठी सौर प्रकल्प विकासकांना कार्यादेश देण्यात आलेले आहेत. शेतकरी आणि राज्याच्या दृष्टीने महत्त्वाकांक्षी असलेल्या या प्रकल्पाची कामे विहित कालावधीत व मुदतीत पूर्ण न करणाऱ्या विकासकांवर नियमानुसार कारवाई करण्याचे आदेश महाराष्ट्र ऊर्जा विभागाच्या अप्पर सचिव आभा शुक्ला यांनी दिले.
सौर कृषी वाहिनी योजनेला गतिमान करण्यासाठी शुक्रवारी (दि. २६) नाशिकरोड येथील विभागीय आयुक्त कार्यालयातील सभागृहात शु्क्ला यांच्या अध्यक्षतेखाली महावितरण, सौर संबंधित सौर प्रकल्प विकासक आणि जिल्हा प्रशासनाचे अधिकारी यांची एकत्रित आढावा बैठक पार पडली. यावेळी त्या बोलत होत्या. बैठकीला अप्पर प्रधान सचिव आभा शुक्ला यांच्यासह महावितरणचे मुख्य अभियंता सुंदर लटपटे, अधीक्षक अभियंता संतोष सांगळे, निवासी उपजिल्हाधिकारी रोहित राजपूत उपस्थित होते. शासनाने ‘मुख्यमंत्री सौर कृषी वाहिनी योजना 2.0’ योजनेअंतर्गत प्रकल्प उभारणाऱ्या विकासकांनी कार्याची प्रगती ऑनलाइन पोर्टलवर अद्यावत करावी. जे सौर प्रकल्प विकासक या सामाजिक दायित्वाच्या प्रकल्पामध्ये गंभीरतेने काम करणार नाहीत, त्यांच्यावर नियमानुसार कारवाई करण्यात येईल. महावितरणचे उपकार्यकारी अभियंते यांनी सुद्धा या योजनेच्या दैनंदिन कामावर समन्वयक अधिकारी म्हणून लक्ष केंद्रित करून देखरेख ठेवण्याचे निर्देश आभा शुक्ला यांनी दिले.
‘मुख्यमंत्री सौर कृषी वाहिनी योजना 2.0’ योजना गतिमान करण्यासाठी नाशिक जिल्ह्यात १८६ विद्युत उपकेंद्र या योजनेतून सौर उर्जिकरण होणार असून एक हजार ३४३ मेगावॉट वीज निर्मित होणार आहे. यासाठी दोन टप्प्यात विविध सौर प्रकल्पाचे सौर विकासकांना कार्यादेश देण्यात आलेले आहेत. यामुळे जिल्ह्यातील शेतकऱ्यांना दिवसा आणि अखंडित वीज मिळणार असल्याची माहिती शुक्ला यांनी दिली.
सौर प्रकल्प विकासकांच्या प्रतिनिधींनी प्रकल्पातील अडचणी मांडल्या. प्रकल्प पूर्ण करताना काही ठिकाणी प्रकल्पाच्या जागेत अतिक्रमण केलेले असून काही ठिकाणी अडथळा निर्माण करीत असल्याची माहिती बैठकीत दिली. निवासी उपजिल्हाधिकारी रोहित राजपूत यांनी यांनी या प्रकल्पातील जागेवर करण्यात आलेले अतिक्रमण तत्काळ काढण्यासोबतच अडचणी दूर केल्या जातील असे सांगितले.
बैठकीनंतर त्र्यंबकेश्वर उपविभागातील कोणे येथील प्रस्तावित सौर प्रकल्पातील जागेची अप्पर प्रधान सचिव आभा शुक्ला यांनी अधिकाऱ्यांसमवेत प्रत्यक्ष पाहणी केली. बैठकीला महावितरणचे अधीक्षक अभियंता राजेश थूल, देवेंद्र सायनेकर, महावितरणचे सर्व कार्यकारी अभियंते, उपकार्यकारी अभियंते,सौर प्रकल्प विकासक यांचेसह इतर विभागाचे वरिष्ठ अधिकारीही उपस्थित होते.
