नाशिक : भुजबळांसाठी मुलगा आणि पुतण्या इतकेच ओबीसी आहेत. भुजबळांना अन्य ओबीसी दिसत नाहीत, अशा शब्दांत राज्याचे नवे कृषिमंत्री अॅड. माणिकराव कोकाटे यांनी छगन भुजबळ यांच्यावर टीकास्त्र डागले आहे. आमच्या पक्षाने भुजबळांवर कोणताही अन्याय केलेला नाही, त्यामुळे भुजबळांची समजूत काढण्याचा प्रश्नच येत नाही. जातीयवादाचा ढोंग मला अजिबात मान्य नाही, असे नमूद करत भुजबळ यांना मंत्रिपद मिळावे म्हणून मी मध्यस्थी करणार नाही, अशी स्पष्ट भूमिका मंत्री कोकाटे यांनी मांडली.
महायुतीच्या मंत्रिमंडळात मंत्रिपदाची संधी न मिळाल्याने नाराज असलेल्या भुजबळ यांनी सोमवारी(दि.२३) मुख्यमंत्री देवेंद्र फडणवीस यांची भेट घेत बंद दरवाज्याआड चर्चा केली. यासंदर्भात मंत्री कोकाटे यांनी माध्यमांशी संवाद साधताना भुजबळ यांच्यावर सडकून टीका केली. कोकाटे म्हणाले की, भुजबळ यांनी मुख्यमंत्री फडणवीस यांची भेट घेतली ही चांगली गोष्ट आहे. मुख्यमंत्र्यांची भेट घेऊन त्यांनी आपल्या मनातले शल्य बोलून दाखवले असेल. मुख्यमंत्र्यांनी त्यावर तोडगा काढण्याचे आश्वासन दिले असेल, तर मुख्यमंत्री बोलल्याप्रमाणे करतील. मंत्रिमंडळात 42 मंत्र्यांपैकी 17 मंत्री हे ओबीसी तर 16 मंत्री मराठा समाजाचे आहेत. ओबीसींना समान न्याय देण्याची भूमिका मुख्यमंत्र्यांनी घेतली. त्यामुळे कोणावरही अन्याय होणार नाही, अशी त्यांची भूमिका असल्याने त्यांचे स्वागत आहे. भुजबळांच्या संदर्भात मुख्यमंत्र्यांना जो निर्णय घ्यायचाय तो ते घेऊ शकतात, असे कोकाटे म्हणाले.
भुजबळांना काय वाटते त्यांच्या मनात काय हे कोण सांगेल? त्यांना ओबीसी म्हणून ते त्यांचा मुलगा आणि त्यांचा पुतण्या एवढेच दिसत असेल. दुसरे ओबीसी दिसत नसतील तर त्याला काय करणार?, असा सवाल कोकाटे यांनी केला. चूक असेल तर समजूत काढणार ना, चूकच नसेल तर समजूत कशाची काढणार? भुजबळांना मंत्रिपद न देऊन आमच्या पक्षाची कुठल्याही प्रकारची चूक झालेली नाही. आमच्या पक्षाने जो न्याय भुजबळांना दिला तो आतापर्यंत कोणत्याही पक्षाने दिला नाही, असेही कोकाटे यांनी ठासून सांगितले.
