नाशिक : महिलांच्या आरोग्य संवर्धनासाठी राज्य शासनाने हाती घेतलेली ह्यूमन पॅपिलोमा व्हायरस एच.व्ही.पी लसीकरण मोहीम (एच.पी.व्ही) लवकरच नाशिक जिल्ह्यात राबविण्यात येणार आहे. खासगी रुग्णालयांमध्ये ३ ते ५ हजार रुपयांपर्यंत किंमत असलेली ही लस आता शासनाच्या पुढाकारामुळे १४ ते १५ वर्षे वयोगटातील सर्व किशोरवयीन मुलींना मोफत देण्यात येणार आहे. यासाठी शाळांमार्फत सर्वेक्षण सुरू असून, प्रत्येक शाळेतील मुलींची माहिती संकलित केली जात आहे.
यामध्ये १४ ते १५ वर्ष वयोगटातील किशोरवयीन मुलींना मोफत लसीकरण केले जाणार आहे. किशोरवयीन मुलींना ही लस मोफत दिली जाणार असून, ती ग्रामीण रुग्णालये आणि प्राथमिक आरोग्य केंद्रांवर उपलब्ध होईल. ही लसीकरण मोहीम प्रभावीपणे राबवण्यासाठी डॉक्टर्स आणि वैद्यकीय अधिकाऱ्यांचे प्रशिक्षण सध्या सुरू आहे. हे प्रशिक्षण पूर्ण झाल्यानंतर लगेचच मोहीम सुरू होईल, ही प्रतिबंधात्मक लस वेळेवर घेतल्यास कर्करोगाचा धोका ९९ टक्के पर्यंत कमी होतो. महिलांच्या आरोग्याच्या दिशेने महत्वाचे पाऊल असल्याचे जिल्हा आरोग्य अधिकारी अशी माहिती जिल्हा माता व बाल संगोपन अधिकारी डॉ. हर्षल नेहेते यांनी दिली आहे.
कर्करोग होण्याची मुख्य कारणे
बदलत्या जीवनशैली, असंतुलित आहार, तणाव आणि स्वच्छतेच्या अभावामुळे हा कर्करोग महिलांमध्ये झपाट्याने वाढत असून, देशातील महिलांमध्ये होणा-या कर्करोगांमध्ये दुस-या क्रमांकावर आहे. हा संसर्ग लैंगिक संपर्काद्वारे होऊ शकतो. लसीकरण केल्यास शरीरात या विषाणूविरुध्द प्रतिकारशक्ती निर्माण होते आणि गर्भाशय मुखाच्या कर्करोगाचा धोका तब्बल ९९ टक्क्यांनी कमी होतो. महिलांमध्ये गर्भाशय मुखाचा कर्करोग होण्यास असुरक्षित लैंगिक संबंध, हार्मोनल इनबॅलन्स, तणाव, प्रदुषण आणि स्वच्छतेचा अभाव ही प्रमुख कारणे ठरतात. ह्युमन पॅपिलोमा व्हायरस हे या कर्करोगाचे मुख्य कारण आहे. एचपीव्ही लसीकरणामुळे या कर्करोगावर प्रतिबंध घालणे शक्य होणार आहे.
