येवला (नाशिक): सामान्य नागरिकांना घरबसल्या पारदर्शक, जलद सेवा मिळावी या उद्देशाने शासनाने एक महत्वाचा निर्णय घेतला आहे. नवीन नियमानुसार नागरिकांना आता केवळ १५ रुपयांचे शुल्क भरून महाभूमी पोर्टलवरून अधिकृत डिजिटल सातबारा उतारा मिळणार आहे.
विशेष म्हणजे या डिजिटल उताऱ्यावर तलाठ्याची स्वाक्षरी किंवा शिक्क्याची आवश्यकता राहणार नाही. डिजिटल स्वाक्षरी, क्यूआर कोड आणि १६ अंकी पडताळणीमुळे हे उतारे कायदेशीरदृष्ट्या वैध ठरणार आहे. सर्व सरकारी निमसरकारी, बँकिंग व न्यायालयीन व्यवहारात ते अधिकृत मानले जातील.
अनेक वर्षांपासून नागरिकांना तलाठी किंवा मंडळ कार्यालयात वारंवार चकरा मारत सातबारा मिळवावा लागत होता. काही ठिकाणी अधिकृत उताऱ्यासाठी चिरीमिरी देण्याच्या तक्रारीही समोर येत असल्याने या नव्या परिपत्रकामुळे या सर्व अडचणींवर पूर्णविराम लागला आहे. संगणकीकृत, डेटाबेस आधारित आणि डिजिटल स्वाक्षरीयुक्त उतारे सर्व शासकीय कामांसाठी वैध मानले जात आहे. ग्रामीण आणि शहरी भागातील नागरिकांसाठी हा महत्वपूर्ण दिलासा ठरणार आहे.
सातबारा, ८-अ व फेरफार काढण्यासाठी शासनाच्या अधिकृत वेबसाईटला भेट द्यावी. यात तुम्ही डिजिटल पेमेंट करुन उतारे काढू शकता. या डिजिटल स्वाक्षरीवर तलाठी यांची सही किंवा शिक्क्याची आवश्यकता नाही. डिजिटल स्वाक्षरी, क्यूआर कोड, १६ अंकी पडताळणी क्रमांक असणार आहे. त्यामुळे हे डिजिटल सातबारा कायदेशीरदृष्ट्या वैध असणार आहेत.
सातबारा असा करा डाऊनलोड
महाराष्ट्र शासनाच्या महसूल विभागाच्या महाभूमीच्या https://digitalsatbara.mahabhumi.gov.in/ या वेबसाईटला भेट द्या.
ओटीपी बेस्ड लॉगीन पर्याय निवडून मोबाईल क्रमांक नोंदवा, ओटीपी आल्यावर तो नोंदवून लॉगीन करा.
जिल्हा, तालुका, गाव निवडा. अंकित सातबारा की अक्षरी सातबारा पर्याय निवडा.
सर्व्हे नंबर किंवा गट क्रमांक शोधा. पीक पाहणी डाटा आवश्यक असल्यास त्याचा पर्याय निवडा.
एका उताऱ्यासाठी आवश्यक १५ रुपयांचे पेमेंट ऑनलाईनद्वारे करा. ऑनलाईन सातबारा डाऊनलोड करण्याचा पर्याय येईल. हा सातबारा पीडीएफ स्वरुपात असेल.
शासनाचा हा निर्णय शेतकरी, जमीनधारक आणि सामान्य नागरिकांसाठी सुविधा, पारदर्शकता आणि वेगवान सेवा देणारा असून तालुक्यातील शेतकरी व सामान्य नागरिक या निर्णयाचे नक्की स्वागत करेल.
बाबासाहेब गाढवे, प्रांताधिकारी, येवला, नाशिक.
यापुढे तलाठ्याच्या सही आणि शिक्क्याची गरज संपली आहे. डिजिटल स्वाक्षरी असलेले सातबारा व ८-अ तसेच फेरफार उतारे अधिकृत आणि वैध ठरणार आहे.
आबा महाजन, तहसीलदार, येवला, नाशिक.
