नंदुरबार : केबल चोरणाऱ्या आठ जणांच्या टोळीला स्थानिक गुन्हे शाखेने ताब्यात घेतले असून टोळीतील सर्व नंदुरबार तालुक्यातील चाकळे गाव येथील राहणार आहेत. त्यांच्याकडून सुमारे दीड लाखांचा मुद्देमाल जप्त करण्यात आला असून चोरीचा माल खरेदी करणाऱ्या एका व्यापाऱ्याची व भंगार विक्रेत्याची चौकशी करण्यात येत आहे.
तालुका पोलीस ठाणे हद्दीतील शनिमांडळ गाव शिवारातील सुझलॉन कंपनीच्या टॉवर मधून काही अज्ञात चोरटयांनी कॉपर केबल चोरुन नेल्याची फिर्याद खंडू वना पाटील यांनी दिली. त्यावरून नंदुरबार तालुका पोलीस ठाण्यात गुन्हा दाखल करण्यात आला होता. त्याअनुषंगाने स्थानिक गुन्हे शाखेकडून समांतर तपास सुरू असतांना स्थानिक गुन्हे शाखा पोलीस निरीक्षक किरणकुमार खेडकर यांना मिळालेल्या गोपनीय माहितीनुसार नंदुरबार तालुका पोलीस ठाणे हद्दीतील चाकळे गावातील किशोर मालचे याने त्याचे साथीदारांसह मिळून केली. तो सध्या नंदुरबार शहरातील जिजामाता कॉलेज परिसरात वावरत असल्याचे सांगण्यात आले. ही खात्रीशीर माहिती मिळाल्यावरुन पोलीस अधीक्षक श्रवण दत्त. एस यांच्या मार्गदर्शनाखाली खेडकर यांनी जिजामाता महाविद्यालय परिसरात गस्त घालत किशोर सुपडू मालचे (रा. चाकळे ता.जि. नंदुरबार) याला ताब्यात घेऊन चौकशी करण्यात आली. त्याने साथीदार गणेश शत्रु सोनवणे, दिलीप प्रताप सोनवणे, सतिश संतोष मोरे, शाम नाना मालचे, राम नाना मालच, रमा सुपडू, विनोद सुपडू, देवा (पुर्ण नाव माहित नाही), (सर्व राहणार चाकळे ता. जि. नंदुरबार) यांच्या मदतीने चोरी केल्याची माहिती दिली.
गुन्हयातील चोरी केलेला मुद्देमाल हा नंदुरबार शहरातील जम-जम हॉस्पीटलचे मागे राहणाऱ्या शाकीर युसूफ काकर या भंगार व्यापा-यास विक्री केल्याचे आरोपीकडून सांगण्यात आले. त्याअनुषंगाने स्थानिक गुन्हे शाखा पथकाने भंगार व्यापाऱ्याचा शोध घेतला असता तो मिळून आल्याने त्यास नमुद गुन्हयातील मुद्देमालाबाबत विचारता त्याने सदरचा माल हा सुमित नरेंद्र जैन, (रा. शिवाजी रोड, नंदुरबार) यास विक्री केले असल्याचे सांगितले. त्यानुसार लागलीच स्थानिक गुन्हे पथकाने सुमित जैन यास देखील ताब्यात घेऊन चोरीचा मुद्देमाल बाबत विचारणा केली असता त्याने सदरचा मुद्देमाल हा त्याचे पातोंडा शिवारातील गॅस गोडावूनचे पाठीमागील बाजुस ठेवले असल्याचे सांगितले. या ठिकाणाहून एकुण 1,57,850/- रुपये किमतीची सुझलॉन टॉवरमध्ये वापरण्यात येणारी कॉपर केबल मुद्देमाल मिळून आला असून तो पोलीसांकडून जप्त करण्यात आला आहे.
नंदुरबार जिल्ह्याचे पोलीस अधीक्षक अपर पोलीस अधीक्षक आशित कांबळे, मुकेश पवार, राकेश मोरे, रमेश साळुंखे, मोहन ढमढेरे, विजय ढीवरे, अभय राजपुत, आनंदा मराठे या पोलीस पथकाने ही कामगिरी केली.
