जळगाव : बोदवड तालुक्यातील केसरी स्पोर्ट्स अकॅडमीच्या १३ क्रिकेटपटूंना घेऊन परतणाऱ्या क्रुझर वाहनाला सोमवारी (दि.9) पहाटे सव्वा पाच वाजता अहमदनगर-संभाजीनगर महामार्गावर नेवासा तालुक्यातील उस्थळ दुमाला शिवारात अपघात झाला. पुण्यातून एमपीएल क्रिकेट सामना पाहून परतत असताना मागून आलेल्या ट्रकने जोरदार धडक दिल्याने दोन तरुण खेळाडूंचा दुर्दैवी मृत्यू झाला असून ११ जण किरकोळ जखमी झाले आहेत.
बोदवड येथील केसरी स्पोर्ट्स अकॅडमीचे १३ क्रिकेटपटू पुण्यातील गहुंजे मैदानावर आयोजित एमपीएल सामन्याला उपस्थित होते. सामना आटोपल्यानंतर हे सर्व खेळाडू क्रुझर (क्रमांक MH-20-DJ-4834) मधून परतत होते. दरम्यान, उस्थळ दुमाला गावाजवळ त्यांच्या वाहनास मागून येणाऱ्या ट्रकने जोरात धडक दिली.
या अपघातात प्रथमेश योगेश तेली (वय १४, रा. जामखी दरवाजा, बोदवड) याचा जागीच मृत्यू झाला. तर वृषभ बबन सोनवणे (वय १६, रा. बोदवड) याचा उपचारादरम्यान मृत्यू झाला. अन्य ११ खेळाडू जखमी झाले असून त्यांच्यावर नेवासा फाटा येथील रुग्णालयात उपचार सुरू आहेत. सध्या त्यांची प्रकृती स्थिर असल्याचे सांगण्यात येत आहे.
अपघाताची माहिती मिळताच नेवासा पोलीस ठाण्याचे निरीक्षक धनंजय जाधव व त्यांच्या सहकाऱ्यांनी घटनास्थळी धाव घेतली. पोलिसांनी जखमींना तातडीने रुग्णवाहिकेच्या सहाय्याने रुग्णालयात हलवले. अपघाताचे नेमके कारण अद्याप स्पष्ट झाले नसले तरी नेवासा पोलिसांनी तपास सुरू केला आहे. या घटनेची नोंद अकस्मात मृत्यू म्हणून करण्यात आली आहे. या दुर्घटनेमुळे बोदवड तालुक्यात हळहळ व्यक्त केली जात असून परिसरात शोककळा पसरली आहे.
