Raver Illegal Weapons Arrest
रावेर : शहरातील बसस्थानकाच्या मागील छोरिया मार्केट परिसरात बेकायदेशीर गावठी कट्टा बाळगणाऱ्या २० वर्षीय तरुणाला रावेर पोलिसांच्या गुन्हे शोध पथकाने ताब्यात घेतले. त्याच्याकडून २५ हजार रुपये किमतीचा देशी बनावटीचा गावठी कट्टा आणि एक हजार रुपये किमतीची दोन जिवंत काडतुसे जप्त करण्यात आली आहेत. कृष्णा दत्तू पाटील (वय २०, रा. रोकडा हनुमान मंदिर नगर, रावेर) असे ताब्यात घेतलेल्या तरुणाचे नाव आहे.
गुरुवारी (दि. २०) दुपारी छोरिया मार्केट परिसरात एक तरुण कंबरेला बेकायदेशीर शस्त्र बाळगून संशयास्पदरीत्या फिरत असल्याची माहिती पोलिसांच्या गुप्त बातमीदाराकडून मिळाली. त्यानंतर गुन्हे शोध पथकाने तातडीने घटनास्थळी पोहोचून सापळा रचला.
पोलिसांची चाहूल लागताच संबंधित तरुणाने तेथून निसटण्याचा प्रयत्न केला. मात्र, पोलिसांनी त्याला घेराव घालून पंचांसमक्ष ताब्यात घेतले. अंगझडती घेतली असता त्याच्या कंबरेला तपकिरी रंगाचा लोखंडी गावठी कट्टा आणि दोन जिवंत काडतुसे आढळून आली.
पोलीस शिपाई सुकेश तडवी यांच्या फिर्यादीवरून कृष्णा पाटील याच्याविरोधात रावेर पोलीस ठाण्यात भारतीय हत्यार कायदा कलम ३/२५ अंतर्गत गुन्हा दाखल करण्यात आला आहे. कट्टा त्याने कोणाकडून मिळवला, तसेच तो कोणत्या उद्देशाने बाळगत होता, याचा तपास पोलिसांकडून सुरू आहे.
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत आणि फैजपूर विभागाचे पोलीस उपअधीक्षक अनिल बडगुजर यांच्या मार्गदर्शनाखाली रावेरचे पोलीस निरीक्षक संदीप पाटील, सहायक पोलीस निरीक्षक हरिदास बोचरे आणि गुन्हे शोध पथकाने केली.
