जळगाव : शहरातील स्वामी नारायण मंदिराच्या प्राणप्रतिष्ठा सोहळ्यात कर्तव्यावर असताना पोलीस उपनिरीक्षक यांना हृदयविकाराचा झटका आला. त्यांना तत्काळ रुग्णालयात दाखल करण्यात आले. मात्र रविवार (दि.15) रोजी दुपारच्या सुमारास त्यांचे निधन झाले असल्याचे वैद्यकीय अधिकारी यांनी सांगितले.
भुसावळ रोडवरील स्वामी नारायण मंदिराच्या प्राणप्रतिष्ठा सोहळ्याच्या ठिकाणी कर्तव्यावर तैनात असलेल्या रामानंद नगर पोलीस ठाण्याचे उपनिरीक्षक गौतम सांडू केदार (वय ५६, रा. पोलीस लाईन) यांना हृदयविकाराचा झटका आला. त्यांच्यावर गेल्या चार दिवसांपासून खासगी रुग्णालयात उपचार सुरु होते. उपचार घेत असताना रविवारी (दि.15) रोजी दुपारच्या सुमारास त्यांचे निधन झाले.
गौतम केदार यांना एक वर्षांपूर्वी उपनिरीक्षक पदावर पदोन्नती मिळाली होती. त्यानंतर त्यांची नियुक्ती रामानंद नगर पोलीस ठाण्यात झाली. भुसावळ रोडवरील स्वामी नारायण मंदिराच्या प्राणप्रतिष्ठा सोहळ्याच्या ठिकाणी कर्तव्यावर असताना, गुरुवारी (दि.12) रोजी सायंकाळी छातीत दुखू लागल्याने त्यांना तत्काळ खासगी रुग्णालयात दाखल करण्यात आले. उपचार सुरु असताना रविवारी (दि.15) त्यांचे निधन झाले. त्यांच्या पश्चात वडील, पत्नी, मुलगा आणि मुलगी असा परिवार आहे.
