जळगाव : कृषी क्षेत्रासाठीच्या उत्पादन क्षेत्रातील देशातील आघाडीची कंपनी असलेल्या जैन इरिगेशन सिस्टीम्स लिमिटेडने ३१ मार्च २०२५ रोजी संपलेल्या चौथ्या तिमाहीचे आणि वर्षाचे लेखापरीक्षण केलेले (ऑडिटेड) एकत्रित आणि स्वतंत्र निकाल जाहीर केले असून कंपनीने सातत्यपुर्ण कामगिरी बजावली आहे. कंपनीचा एकत्रित वार्षिक करपश्चात नफा २५.७ कोटी रूपयांवर झेपावला आहे.
संचालक मंडळाच्या बैठकीत ३१ मार्च २०२५ रोजी संपलेली चौथी तिमाही आणि आर्थिक वर्षासाठी आर्थिक कामगिरी मंजूर करण्यात आले. कंपनीने वार्षिक एकत्रित उत्पन्न ५७७९.३ कोटी रूपयांवर नोंदवले गेले. तर इबिडा (EBIDTA) ७१६.८ कोटी रूपये नोंदवला गेला आहे. तर वार्षिक एकत्रित करपश्चात नफा (पॅट) २५.७ कोटी रूपये झाला. ३१ मार्चअखेरीस स्वतंत्र वार्षिक उत्पन्न ३२५९ कोटी रूपये नोंदविले गेले आहे. तर जानेवारी-मार्च या चौथ्या तिमाहीसाठी स्वतंत्र उत्पन्न १०२७.३ कोटी रूपयांवर झेपावले आहे.
“२०२४-२५ आर्थिक वर्षाच्या चौथ्या तिमाहीत कंपनीने एकूण महसुलात १.३ टक्के सुधारणा करत स्थिर कामगिरी नोंदवली, तसेच इबीडामध्ये थोडी सुधारणा दिसून आली. संपूर्ण वर्षात महसूलात झालेली घट प्रामुख्याने देशांतर्गत व्यवसायामुळे झाली. मात्र, कामकाजातील रोख प्रवाहात (कॅश फ्लोमध्ये) लक्षणीय सुधारणा झाली असून हे कार्यक्षम खेळत्या भांडवलाच्या व्यवस्थापनामुळे शक्य झाले आहे. आम्ही विशेषतः पाईपिंग, हाय-टेक ॲग्री आणि आंतरराष्ट्रीय बाजारपेठ या आमच्या मुख्य व्यवसायांवर लक्ष केंद्रित करत आहोत. आगामी काळात सरकारच्या पायाभूत सुविधा खर्चामुळे आणि स्थिर कृषी उत्पादनामुळे आम्हाला किरकोळ मागणीत पुनरुज्जीवन होईल, अशी अपेक्षा आहे. आमचे लक्ष्य कर्ज कमी करणे, खेळते भांडवल कार्यक्षम करणे आणि रोख प्रवाह (कॅश फ्लो) सुधारणा करणे आहे.”
अनिल जैन, उपाध्यक्ष व व्यवस्थापकीय संचालक, जैन इरिगेशन सिस्टीम्स लि., जळगाव.
