जळगांव; पुढारी वृत्तसेवा : धरणगाव तालुक्यातील मुसळी फाट्याजवळ कपाशी व्यापाऱ्याची गाडी आडवून दीड कोटींची रक्कम घेऊन तिन अज्ञात पसार झाल्याची घटना आज (दि. १७) घडली. दुपारी १ वाजताच्या सुमारास ही घटना घडली. या घटनेमुळे जिल्ह्यात खळबळ उडाली आहे. याबाबत धरणगाव पोलीस ठाण्यात गुन्हा दाखल करण्याचे काम सुरू आहे.
याबाबत सुत्रांकडून मिळालेली माहिती अशी की, आज दुपारी (दि. १७) धरणगाव तालुक्यातील पिंप्री येथील व्यापारी चारचाकीमधून दुर्गेश इम्पेक्स जिनिंगची रक्कम घेऊन जळगावहून पिंप्रीला जात होते. दुपारी १ वाजेच्या सुमारास मुसळी फाट्याजवळील निलॉन्स कंपनी समोरील उड्डाण पुलाच्या खाली व्यापाऱ्याची गाडी येताच बोलेरो कारमधून आलेल्या अज्ञात तिघांनी व्यापाऱ्याची गाडी आडविली. व्यापाऱ्याची गाडी अडवून गाडीतून काही मिनीटात दीड कोटीचे पेमेंट असलेली पिशवी घेवून लूट करत तिन्ही दरोडेखोर जळगावच्या दिशेने पसार झाले. या घटनेची माहिती मिळाल्यानंतर धरणगाव पोलीस ठाण्याचे पोलीस कर्मचारी आणि स्थानिक गुन्हे शाखेचे पथक घटनास्थळी दाखल झाले. दरम्यान बोलेरो कारमधून आलेल्या चोरट्यांनी कार सोडून पसार झाल्याचे वृत्त समोर येत आहे. या घटनेमुळे जळगाव जिल्ह्यात मोठी खळबळ उडाली आहे. शेवटचे वृत्त हाती आले तेव्हा धरणगाव पोलीस ठाण्यात गुन्हा दाखल करण्याचे काम सुरू होते.
