जळगाव : चोरीच्या मोटरसायकल विक्री करण्यासाठी येणार असल्याच्या माहिती मिळाल्यावरून एमआयडीसी पोलिसांनी आरोपीला अटक केली आहे. त्याच्याकडून तब्बल पाच चोरीच्या मोटरसायकली जप्त करण्यात आल्या आहेत.
एमआयडीसी अजिंठा चौकात एक इसम हा चोरीच्या मोटार सायकली विक्रीसाठी येणार असल्याची माहिती पोलीस निरीक्षक संदीप पाटील यांना रविवार (दि.22) रोजी मिळाली. त्याआधारे पोलीस पथकातील विशाल कोळी, राहुल रपडे यांच्या आदेशानुसार पुढील तपास करण्यात आला.
माहितीच्या मागोवा घेऊन राहुल तायडे, चंद्रकांत चनके, योगेश बारी, फिरोज तडवी हे अजिंठा चौफुली या ठिकाणी सिव्हील ड्रेसमध्ये पहारा देत असताना संशयित आरोपी दिपक प्रेमसिंग सोळंके (रा. वरठाण, ता सोयगांव जिल्हा छत्रपती संभाजी नगर) यास ताब्यात घेतले. चौकशी केली असता त्याच्या तब्येतून एचएफ डीलक्स ही मोटरसायकल मिळून आली. सदर आरोपीविरोधात जिल्हापेठ पोलीस स्टेशन येथे मोटार सायकल चोरीचा गुन्हा दाखल असल्याची माहीती मिळून आली. त्यावरुन दिपक सोळंके याची चौकशी केली असता त्याने जळगाव शहरातुन 3, छत्रपती संभाजीनगर येथून 1 आणि अडावद येथुन 1 अशा एकुण 5 मोटार सायकली चोरी केल्याची कबुली दिली. या मोटरसायकल त्याच्याकडुन हस्तगत करण्यात आलेल्या आहेत.
सदर कारवाई पोलीस अधीक्षक महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी संदीप गावीत, पोलीस निरीक्षक संदीप पाटील यांचे मार्गदर्शनाखाली राहुल तायडे, चंद्रकांत धनके, योगेश बारी, राहुल रगडे, विशाल कोळी, फिरोज लक्ष्मी यांनी केली आहे. आरोपीस जळगाव शहर पोलीस स्टेशनच्या ताब्यात देण्यात आले आहे.
