जळगाव, पुढारी वृत्तसेवा : जळगाव महानगरपालिकेमध्ये जन्म मृत्यू नोंदणीसाठी आलेल्या दाखल्यांमध्ये तहसीलदार यांच्या सही व शिक्क्याचे बनावट अर्ज आल्याप्रकरणी झालेल्या चौकशी 43 जणांविरुद्ध शहर पोलिसात गुन्हा दाखल करण्यात आला होता. स्थानिक गुन्हे शाखेने यात प्रकरणाचा तपास करून यातील दोन मुख्य वकील आरोपींना अटक केली आहे. त्यांना न्यायालयात हजर केले असता तीन दिवसांची पोलीस कोठडी न्यायालयाने सुनावली आहे, अशी माहिती पोलीस अधीक्षक डॉ महेश्वर रेड्डी यांनी आज (दि.७) पत्रकार परिषदेमध्ये दिली. (Jalgaon Fake Certificate Case)
जळगाव महानगरपालिकेमध्ये जन्ममृत्यू नोंदणी विभागामध्ये तहसील कार्यालयातून ५० दाखल्यांसाठी प्रमाणपत्रे आले होते. या प्रमाणपत्रांवर असलेले तहसीलदार यांचे सही व शिक्के हे बनावट असल्याचा संशय जन्ममृत्यू नोंदणी विभागाला आला होता. याप्रकरणी तहसीलदारांना पत्र लिहून चौकशीची मागणी केली होती. या प्रकरणी तहसीलदार शितल राजपूत यांनी चौकशी करून याप्रकरणी नायब तहसीलदार यांनी दाखल केलेल्या तक्रारीवरून शहर पोलीस ठाण्यात 43 जणांविरुद्ध गुन्हा दाखल करण्यात आला होता.
या प्रकरणाचा बांगलादेशाशी संबंध जोडल्या जात असल्याने शहर पोलीस ठाण्यात दाखल असलेला गुन्हा स्थानिक गुन्हे शाखेकडे तपासासाठी वर्ग करण्यात येऊन पोलिसांनी या प्रकरणातील 43 जणांची तपासणी करून संशयित आरोपी वकील शेख मोहम्मद रईस बागवान (रा. शाहूनगर, जळगाव), शेख मोहसीन शेख सादिक (मणियार पिंप्राळा, जळगाव) यांना अटक करण्यात आली होती. त्यांना न्यायालयात हजर केले असता त्यांना तीन दिवसांची पोलीस कोठडी देण्यात आली आहे.
